Koson tumanidagi “Mullali” mahallasi va “Gulbog‘” qishlog‘i o‘rtasida joylashgan ta’mirtalab ko‘prik yopilganiga 4 oy bo‘ldi. O‘tgan vaqt mobaynida ko‘prik ta’mirlanishi ortga surilgani va hatto ta’mirlash ishlari boshlanmagani ushbu yo‘ldan o‘tuvchi haydovchilarining e’tiroziga sabab bo‘lmoqda.
Bu haqda “Daryo”ga murojaat qilgan haydovchilarning aytishicha, ko‘prik e’tiborsiz qoldirilgani bois haydovchilar “Oqtepa” qishlog‘idan o‘tuvchi yo‘ldan yurishga majbur bo‘lmoqda. Bu esa yo‘lovchi Damas’lar yo‘lining 9 kilometrga ko‘payishiga sabab bo‘lmoqda.
— 4 oydan beri shu ahvol, qishloq orasidan yurishga majbur bo‘lyapmiz, — deydi Damas haydovchilaridan biri Shermat Qodirov. – Bu esa yo‘limizni 9 kilometrga ko‘paytirish barobarida o‘ydim-chuqur yo‘llardan yurishga majbur qilmoqda. Eng yomoni yo‘l juda tor. Qolaversa, aholi xonadonlariga yaqin. Kimdir mol haydab o‘tsa, kimdir yo‘lni kesib o‘tayotgan bo‘ladi.
Damas’chilar shikoyatiga ko‘ra ko‘prik yopilgani va aylanma yo‘ldan yurishga majbur bo‘lishayotgani sabab kuniga bir marta manzilga borib kelishga ulgurishyapti.
— 2,5 million so‘mga litsenziya qilganmiz, oyiga 500 ming so‘m to‘lashimiz kerak. Ammo yo‘l aylanma bo‘lgani bois manzilga bir kunda bir marta borib kelishga ulguryapmiz, xolos, — deydi Jahongir Abdiyev. – Litsenziya beruvchilar va bizni nazorat qiluvchi uyushmalarni yo‘lning ahvoli qiziqtirmaydi. Ular faqat pulni to‘lashimizni talab qilishadi.
Ushbu hududda yashovchi yo‘lovchilardan Shuhrat Abdiyevning aytishicha, yo‘lning torligi sabab yo‘lovchi tashuvchi Damas’lardan biri traktor tirkamasiga urilib ketgan.
— Yaxshiyamki, Damas’dagi yo‘lovchilarga zarar yetmadi, Yaratgan asradi, — deydi Shuhrat Abdiyev. – Ko‘prik ta’mirtalab bo‘lgani bois yopishganini to‘g‘ri tushunamiz. Ammo oradan 4 oy muddat o‘tsa-da, ta’mirlash ishlari boshlanmagani yomon-da.
Hududda yashovchi aholi vakillarining ma’lumot berishicha, ushbu ko‘prik tuman markazini 10 dan ortiq qishloq bilan bog‘lab turadi.
— Aylanma yo‘l sabab “Oqtepa”, “Qoraxitoy” kabi qishloqlardan o‘tishga majbur bo‘lamiz, — deydi Jahongir Abdiyev. – Oqshom payti qishloq ahlining tirikchiligi ko‘payadi. Kimdir mol haydab kelayotgan bo‘lsa, kimdir ishdan qaytayotgan bo‘ladi. Ko‘cha esa qop-qorong‘i. Shu sabab ham yo‘ldagi odamni yoki molni ko‘z ilg‘amay qolish holati kuzatiladi.
Haydovchilarning ma’lumot berishicha, siljib foydalanish uchun yaroqsiz holga kelgan ko‘prik qurilganiga 40 yil bo‘lgan.
— Ko‘prik qurilganiga 40 yildan oshsa-da, foydalansa bo‘ladigan holda edi, — deydi Jahongir Abdiyev. — “Obod qishloq” dasturiga tushgan qishloqqa yuk tashuvchi yuk avtomobillari ko‘prikni shu ahvolga keltirdi. Me’yordan ortiq yuk olgan avtomobil o‘tib-qaytgach, talabga javob beradigan ko‘prik ham qulaydi-da.
Aholi vakillaridan Buvish Niyozova hamda Hasan Allayorovning aytishicha, Damas haydovchilarining qishloq o‘rtasidan harakatlanishi, aholi vakillariga noqulaylik tug‘dirish barobarida ularning hayotini xavf ostiga qo‘ymoqda.
— Kuni kecha bir Ravon ko’prik yo‘lini to‘suvchi betonga urilibdi. Yaxshiyamki, mashina ichidagilarga zarar yetmagan. Ammo mashina katta xarajat talab etadigan ahvolga kelgan. Mas’ullar yo‘lda biror bir ko‘ngilsizlik bo‘lishini kutishyaptimi? Nega ta’mirlash ishlari kechikayotgani bizni o‘ylantirmoqda.
Koson tuman hokimligi axborot xizmati rahbari Dilshod Nabiyevning “Daryo”ga ma’lumot berishicha, mazkur ko‘prik 2019-yilning oktabr oyida yaroqsiz holga kelgan bo‘lib, bu haqda “Mullali” mahallasida yashovchi fuqaro D.Oqnorov ham murojaat qilgan.
Murojaat Vazirlar Mahkamasining 2011-yil 26-dekabrdagi “O‘zbekiston Respublikasi hududidagi avtomobil yo‘llarida xavfsizlikni ta’minlash va tashkil etish chora-tadbirlari to‘g‘risida”gi qarori hamda tuman hokimining 2019-yil 18-noyabrdagi qarori bilan nazoratga olingan.
Aytilishicha, ko‘prik joylashgan yo‘l mahalliy ahamiyatdagi 4K338 “Koson—Jarqum—Maydayobu” avtomobil yo‘lida joylashgan bo‘lib, tuman yo‘llardan foydalanish unitar korxonasi balansida turadi.
— Avariya holatdagi ko‘prikni qisqa muddatlarda loyihalashtirish qayta qurish ishlarini tashkillashtirish, transportlar harakatini vaqtinchalik mahalliy ahamiyatdagi avtomobil yo‘ldan aylanib o‘tishni ta’minlab, ta’mirlash ishlari 2020-yil I chorak yakuniga qadar bitkazilishini ma’lum qilamiz, — deydi hokimlik axborot xizmati rahbari.
Izoh (0)