Косон туманидаги «Муллали» маҳалласи ва «Гулбоғ» қишлоғи ўртасида жойлашган таъмирталаб кўприк ёпилганига 4 ой бўлди. Ўтган вақт мобайнида кўприк таъмирланиши ортга сурилгани ва ҳатто таъмирлаш ишлари бошланмагани ушбу йўлдан ўтувчи ҳайдовчиларининг эътирозига сабаб бўлмоқда.
Бу ҳақда «Дарё»га мурожаат қилган ҳайдовчиларнинг айтишича, кўприк эътиборсиз қолдирилгани боис ҳайдовчилар «Оқтепа» қишлоғидан ўтувчи йўлдан юришга мажбур бўлмоқда. Бу эса йўловчи Damas’лар йўлининг 9 километрга кўпайишига сабаб бўлмоқда.
— 4 ойдан бери шу аҳвол, қишлоқ орасидан юришга мажбур бўляпмиз, — дейди Damas ҳайдовчиларидан бири Шермат Қодиров. – Бу эса йўлимизни 9 километрга кўпайтириш баробарида ўйдим-чуқур йўллардан юришга мажбур қилмоқда. Энг ёмони йўл жуда тор. Қолаверса, аҳоли хонадонларига яқин. Кимдир мол ҳайдаб ўтса, кимдир йўлни кесиб ўтаётган бўлади.
Damas’чилар шикоятига кўра кўприк ёпилгани ва айланма йўлдан юришга мажбур бўлишаётгани сабаб кунига бир марта манзилга бориб келишга улгуришяпти.
— 2,5 миллион сўмга лицензия қилганмиз, ойига 500 минг сўм тўлашимиз керак. Аммо йўл айланма бўлгани боис манзилга бир кунда бир марта бориб келишга улгуряпмиз, холос, — дейди Жаҳонгир Абдиев. – Лицензия берувчилар ва бизни назорат қилувчи уюшмаларни йўлнинг аҳволи қизиқтирмайди. Улар фақат пулни тўлашимизни талаб қилишади.
Ушбу ҳудудда яшовчи йўловчилардан Шуҳрат Абдиевнинг айтишича, йўлнинг торлиги сабаб йўловчи ташувчи Damas’лардан бири трактор тиркамасига урилиб кетган.
— Яхшиямки, Damas’даги йўловчиларга зарар етмади, Яратган асради, — дейди Шуҳрат Абдиев. – Кўприк таъмирталаб бўлгани боис ёпишганини тўғри тушунамиз. Аммо орадан 4 ой муддат ўтса-да, таъмирлаш ишлари бошланмагани ёмон-да.
Ҳудудда яшовчи аҳоли вакилларининг маълумот беришича, ушбу кўприк туман марказини 10 дан ортиқ қишлоқ билан боғлаб туради.
— Айланма йўл сабаб «Оқтепа», «Қорахитой» каби қишлоқлардан ўтишга мажбур бўламиз, — дейди Жаҳонгир Абдиев. – Оқшом пайти қишлоқ аҳлининг тирикчилиги кўпаяди. Кимдир мол ҳайдаб келаётган бўлса, кимдир ишдан қайтаётган бўлади. Кўча эса қоп-қоронғи. Шу сабаб ҳам йўлдаги одамни ёки молни кўз илғамай қолиш ҳолати кузатилади.
Ҳайдовчиларнинг маълумот беришича, силжиб фойдаланиш учун яроқсиз ҳолга келган кўприк қурилганига 40 йил бўлган.
— Кўприк қурилганига 40 йилдан ошса-да, фойдаланса бўладиган ҳолда эди, — дейди Жаҳонгир Абдиев. — «Обод қишлоқ» дастурига тушган қишлоққа юк ташувчи юк автомобиллари кўприкни шу аҳволга келтирди. Меъёрдан ортиқ юк олган автомобиль ўтиб-қайтгач, талабга жавоб берадиган кўприк ҳам қулайди-да.
Аҳоли вакилларидан Бувиш Ниёзова ҳамда Ҳасан Аллаёровнинг айтишича, Damas ҳайдовчиларининг қишлоқ ўртасидан ҳаракатланиши, аҳоли вакилларига ноқулайлик туғдириш баробарида уларнинг ҳаётини хавф остига қўймоқда.
— Куни кеча бир Ravon кўприк йўлини тўсувчи бетонга урилибди. Яхшиямки, машина ичидагиларга зарар етмаган. Аммо машина катта харажат талаб этадиган аҳволга келган. Масъуллар йўлда бирор бир кўнгилсизлик бўлишини кутишяптими? Нега таъмирлаш ишлари кечикаётгани бизни ўйлантирмоқда.
Косон туман ҳокимлиги ахборот хизмати раҳбари Дилшод Набиевнинг «Дарё»га маълумот беришича, мазкур кўприк 2019 йилнинг октябрь ойида яроқсиз ҳолга келган бўлиб, бу ҳақда «Муллали» маҳалласида яшовчи фуқаро Д.Оқноров ҳам мурожаат қилган.
Мурожаат Вазирлар Маҳкамасининг 2011 йил 26 декабрдаги «Ўзбекистон Республикаси ҳудудидаги автомобиль йўлларида хавфсизликни таъминлаш ва ташкил этиш чора-тадбирлари тўғрисида»ги қарори ҳамда туман ҳокимининг 2019 йил 18 ноябрдаги қарори билан назоратга олинган.
Айтилишича, кўприк жойлашган йўл маҳаллий аҳамиятдаги 4К338 «Косон—Жарқум—Майдаёбу» автомобиль йўлида жойлашган бўлиб, туман йўллардан фойдаланиш унитар корхонаси балансида туради.
— Авария ҳолатдаги кўприкни қисқа муддатларда лойиҳалаштириш қайта қуриш ишларини ташкиллаштириш, транспортлар ҳаракатини вақтинчалик маҳаллий аҳамиятдаги автомобиль йўлдан айланиб ўтишни таъминлаб, таъмирлаш ишлари 2020 йил I чорак якунига қадар битказилишини маълум қиламиз, — дейди ҳокимлик ахборот хизмати раҳбари.
Изоҳ (0)