Ijtimoiy tarmoqlarda 2-yanvar kuni Namangan viloyati Mingbuloq tumani hokimi Nurshod Xudoyberdiyevga mansubligi ta’kidlanib tarqatilgan audioyozuv tarqaldi.
Audioyozuv turli haqoratlarga to‘la; uning qachon, qayerda yozib olingani, hokim deb taxmin qilinayotgan ovoz egasi nima sababdan qo‘l ostidagi xodimlarni haqorat qilayotgani noma’lum.
Ushbu holat yuzasidan 2-yanvar kuni Namangan viloyati hokimligining Telegram’dagi kanalida quyidagicha bayonot paydo bo‘ldi:
Mingbuloq tumani hokimiga mansubligi ta’kidlanib tarqatilgan audioyozuv bo‘yicha Namangan viloyati hokimligi bayonotiBiroq keyinroq ushbu bayonot kanaldan o‘chirib tashlangan. Ushbu holat yuzasidan huquq-tartibot organlari hozircha biror axborot bergani yo‘q.Ijtimoiy tarmoqlarda Mingbuloq tumani hokimi Nurshod Xudoyberdiyevga mansubligi ta’kidlanib tarqatilgan, haqoratli so‘zlar ishlatilgan holda olib borilgan muloqotning audioyozuvi qachon, qayerda va qanday holatlarda yuz berganligi hamda boshqa holatlar yuzasidan Namangan viloyati hokimligi tomonidan o‘rganish boshlandi.
O‘rganish natijalari har tomonlama qonun doirasida ko‘rib chiqilib, ular yuzasidan qo‘shimcha bayonot beriladi.
Sababi qanday bo‘lishidan qat’iy nazar, tuman hokimining o‘z leksikasida axloqqa mos kelmaydigan so‘zlarni ishlatishi, shaxsning sha’ni va qadr-qimmatini qasddan kamsituvchi iboralardan foydalanishi viloyat hokimligi tomonidan keskin qoralanadi hamda audioyozuv Mingbuloq tumani hokimiga tegishliligi isbotlansa, tegishli qonuniy jazo chorasi ko‘riladi.
Namangan viloyati hokimligi
Ma’lumot uchun, 1983-yilda Yangiqo‘rg‘on tumanida tug‘ilgan Nurshod Xudoyberdiyev 2019 yil martida Mingbuloq tumani hokimi vazifasini bajaruvchi etib tayinlangan edi. 2004-yilda Namangan muhandislik-pedagogika institutini tamomlagan. Ma’lumoti bo‘yicha mutaxassisligi agromuhandis. U mazkur tayinlovga qadar Norin-Sirdaryo irrigatsiya tizimlari havza boshqarmasi boshlig‘i vazifasida ishlagan.
Izoh (0)