Ўзбекистон Cоғлиқни сақлаш вазирлигида навбатдан ташқари видеоселектор йиғилиши бўлиб ўтди. Вазирликнинг Жамоатчилик билан алоқалар бўлимидан маълум қилишларича, унда 25 декабрь куни Бош прокуратурада бўлиб ўтган Коррупцияга қарши курашиш бўйича Республика идоралараро комиссиясининг соҳада вужудга келган коррупциявий ҳолатлар таҳлилига бағишланган йиғилишида кўтарилган масалаларга алоҳида эътибор қаратилган.
Мавзуга доир: Прокуратура текширувидан сўнг Акушерлик ва гинекология марказининг айрим шифокорлари маоши 15 млн сўмгача ошди
«Шу боис, коррупция ва таъмагирликка қарши курашиш ва унга чек қўйиш борасида, биринчи навбатда, тизимдаги барча меъёрий-ҳуқуқий ҳужжатларни қайта кўриб чиқиб, инвентаризациядан ўтказиш, уни такомиллаштириш, ўз вақтида ижросини таъминлаш, вазирлик ва унинг қуйи бўғинларида ички хавфсизлик тармоғини ташкил этиш, аудит ва жамоатчилик назоратини йўлга қўйиш, юридик хизмат фаолиятини янада кучайтириш, тизимда ахборот-коммуникация технологияларини кенг татбиқ этиш орқали тиббий хизмат кўрсатиш шаффофлиги ва очиқлигини таъминлаш, бунда инсон омили аралашувини кескин камайтириш каби қатор вазифалар аниқ белгилаб олинди», — дея таъкидланган расмий ахборотда.
Видеоселекторда коррупцияга шароит яратиб берадиган кўплаб омиллар, жумладан, даволаш муассасаси таъмирланмаган ёки жиҳозланмаганлиги учун пул йиғиш каби ҳолатларга барҳам бериш мақсадида моддий-техник базани мустаҳкамлаш, тиббиёт ходимларининг моддий манфаатдорлигини янада ошириш тизимини ишлаб чиқиш каби муҳим жиҳатлар ҳақида ҳам тўхталиб ўтилган. Вазирлик томонидан янги, 2020 йил — тизимда коррупцияга қарши кураш йили, дея эълон қилиниб, бу борада аниқ чора-тадбирлар белгилаб олиниши ва ижроси қатъий таъминланиши таъкидланган.
Изоҳ (0)