Yer resurslari, geodeziya, kartografiya va davlat kadastri davlata qo‘mitasi “Ko‘chmas mulkni ro‘yxatga olish va kadastr tizimini takomillashtirish chora-tadbirlari to‘g‘risida”gi Prezident qarori loyihasini muhokamaga qo‘ydi.
Hujjatda qayd etilishicha, so‘nggi yillarda mamlakatda ko‘chmas mulkka bo‘lgan huquqlarni ro‘yxatga olishni takomillashtirish, davlat kadastrlarini yuritish, geofazoviy axborotni shakllantirish bo‘yicha bir qator tub o‘zgarishlar amalga oshirildi. Aholi va tadbirkorlar uchun ro‘yxatga olishning huquqiy bazasi yaratildi va tartib-taomillari soddalashtirildi.
Shu bilan birga, ko‘chmas mulkka bo‘lgan huquqlarni davlat ro‘yxatidan o‘tkazish, davlat kadastrlarini yuritish tizimini o‘rganish natijalari bir qator kamchiliklarni aniqlab berdiki, ular mamlakatning investitsiyaviy jozibadorligini oshirishga, prognozlash va biznesni rivojlantirish uchun to‘g‘ri boshqaruv qarorlarini qabul qilishga to‘sqinlik qiladi.
Bundan tashqari, mavjud imkoniyatlar va salohiyatdan yetarlicha foydalanmaslik, shuningdek, quyidagi ko‘rsatilgan tizimli muammolarning mavjudligi ko‘chmas mulkka bo‘lgan huquqlarni davlat ro‘yxatidan o‘tkazish, davlat kadastrlarini tizimli yuritish, ko‘chmas mulkning kadastr bahosini shakllantirish tizimini yanada takomillashtirishga to‘sqinlik qilmoqda, xususan:
- birinchi – ko‘chmas mulk obyektlarini ro‘yxatga olish yuzasidan olib borilayotgan islohotlarning amaliyotga yetarlicha joriy etilmaganligi oqibatida “Biznes yuritish” yillik hisobotining tegishli indikatorlari bo‘yicha mamlakat reytingi past o‘rinlarda qolmoqda;
- ikkinchi – yaratilgan axborot tizimlariga qaramay, vakolatli vazirliklar va idoralar tomonidan har bir davlat kadastri bo‘yicha geoaxborot ma’lumotlar bazalari shakllantirilmagan;
- uchinchi – ko‘chmas mulk obyektlari bo‘yicha davlat kadastr hisobga olish va ularga bo‘lgan huquqlarni ro‘yxatga olish bilan to‘liq qamrab olinmagan;
- to‘rtinchi – ko‘chmas mulkni davlat kadastr hisobiga olish va unga bo‘lgan huquqlarni davlat ro‘yxatidan o‘tkazishni amalga oshiruvchi ma’muriy boshqaruv tizimi murakkab tuzilmaga ega;
- beshinchi – tarmoqda davlat-xususiy sheriklik elementlari joriy etilmagan;
- oltinchi – tarmoqni moliyaviy rivojlantirish, davlat kadastr ma’lumotlari monetizatsiyasining maqsadli parametrlari yo‘q, bu kadastr va geofazoviy axborot tizimini modernizatsiya qilish va doimiy qo‘llab-quvvatlashga to‘sqinlik qiladi;
- yettinchi – ma’lumotlarni saqlash va shakllantirish usullarining eskirganligi, ularning ortiqcha yopiqligi geofazoviy ma’lumotlar tarmog‘ini rivojlantirishga to‘sqinlik qiladi;
- sakkizinchi – xaritalarni raqamlash to‘liq shakllantirilmagan, kadastr arxivlari hali-hanuz qog‘oz tashuvchilarda qolib ketmoqda;
- to‘qqizinchi – manzilli reyestrning mavjud emasligi davlat xizmatlarini, shu jumladan, interaktiv tarzda taqdim etishga jiddiy to‘sqinlik qilmoqda.
2017–2021-yillarda O‘zbekistonni rivojlantirishning beshta ustuvor yo‘nalishi bo‘yicha Harakatlar strategiyasida ma’muriy islohot konsepsiyasida belgilangan vazifalarga muvofiq, shuningdek, geofazoviy axborotni yaratish va undan foydalanish, davlat kadastrlarini yuritish va ko‘chmas mulk obyektlariga bo‘lgan huquqlarni davlat ro‘yxatidan o‘tkazish sohasida boshqaruv tizimini yanada takomillashtirish maqsadida:
Loyiha ko‘ra quyidagilar negizida Yer resurslari, geodeziya, kartografiya va davlat kadastri davlat qo‘mitasi qoshida Kadastr va geofazoviy axborot agentligi tashkil etiladi:
- Yer resurslari, geodeziya, kartografiya va davlat kadastri davlat qo‘mitasi tarkibidagi Davlat kadastrlari milliy markazi;
- Qoraqalpog‘iston Respublikasi, viloyatlar va Toshkent shahri yer tuzish va ko‘chmas mulk kadastri davlat korxonalari.
Izoh (0)