Joriy yilning 7-dekabr kuni soat 18:10 atrofida Shayxontohur tumani IIO FMBga 45 yoshli Rixsitilla M. murojaat qildi. Bu haqda IIBB matbuot xizmati ma’lum qildi.
U o‘z arizasida taxminan soat 17:00 da uyi yonida Spark rusumli avtomobilini qoldirganligini, uyda bir soat atrofida bo‘lib, uydan chiqqanida avtomobil yo‘qligini ko‘rib, 102 ga qo‘ng‘iroq qilganligini ma’lum qildi.
Rixsitilla M. mashina kalitini avtomobil salonida, avtomobilni esa ochiq qoldirganligini qo‘shimcha qildi.
Jinoyat qidiruv xodimlari videokuzatuv kameralari yozuvlarini o‘rganib chiqdi. Natijada g‘arazgo‘y olib qochilgan avtomobilda qayerga yo‘nalganligini aniqlandi.
Spark bir necha soatdan so‘ng Yunusobod tumanidagi kafe avtoturargohida topildi. Avtomobildan davlat raqamlari yechilgan, mashina kaliti ham yo‘q edi.
Toshkent shahar IIBB Ekspert-kriminalistika markazi xodimlari avtomobilni ko‘zdan kechirib, bir nechta barmoq izlarini topdi. Olib borilgan daktiloskopik ekspertizaning xulosasiga ko‘ra, barmoq izlari qashqadaryolik 23 yoshli Farrux K.ga tegishli bo‘lgan.
10-dekabr kuni Shayxontohur tumanidagi “Chorsu” bozorida patrul-post xizmati xodimlari Farruxni tanib, uni qo‘lga oldi.
So‘roq davomida Farrux K. qilmishini tan olib, olib qochilgan avtomobilning davlat raqamini qayerga tashlaganini ma’lum qildi. Aytilgan joy ko‘zdan kechirilganda avtomobil davlat raqamlari topilib, egasiga qaytarib berildi.
Farrux K.ga nisbatan Jinoyat kodeksining 267-moddasi (“Transport vositasini olib qochish”) bo‘yicha jinoiy ish qo‘zg‘atildi.
Izoh (0)