Жорий йилнинг 7 декабрь куни соат 18:10 атрофида Шайхонтоҳур тумани ИИО ФМБга 45 ёшли Рихситилла М. мурожаат қилди. Бу ҳақда ИИББ матбуот хизмати маълум қилди.
У ўз аризасида тахминан соат 17:00 да уйи ёнида Spark русумли автомобилини қолдирганлигини, уйда бир соат атрофида бўлиб, уйдан чиққанида автомобиль йўқлигини кўриб, 102 га қўнғироқ қилганлигини маълум қилди.
Рихситилла М. машина калитини автомобиль салонида, автомобилни эса очиқ қолдирганлигини қўшимча қилди.
Жиноят қидирув ходимлари видеокузатув камералари ёзувларини ўрганиб чиқди. Натижада ғаразгўй олиб қочилган автомобилда қаерга йўналганлигини аниқланди.
Spark бир неча соатдан сўнг Юнусобод туманидаги кафе автотураргоҳида топилди. Автомобилдан давлат рақамлари ечилган, машина калити ҳам йўқ эди.
Тошкент шаҳар ИИББ Эксперт-криминалистика маркази ходимлари автомобилни кўздан кечириб, бир нечта бармоқ изларини топди. Олиб борилган дактилоскопик экспертизанинг хулосасига кўра, бармоқ излари қашқадарёлик 23 ёшли Фаррух К.га тегишли бўлган.
10 декабрь куни Шайхонтоҳур туманидаги «Чорсу» бозорида патрул-пост хизмати ходимлари Фаррухни таниб, уни қўлга олди.
Сўроқ давомида Фаррух К. қилмишини тан олиб, олиб қочилган автомобилнинг давлат рақамини қаерга ташлаганини маълум қилди. Айтилган жой кўздан кечирилганда автомобиль давлат рақамлари топилиб, эгасига қайтариб берилди.
Фаррух К.га нисбатан Жиноят кодексининг 267-моддаси («Транспорт воситасини олиб қочиш») бўйича жиноий иш қўзғатилди.
Изоҳ (0)