Prezident Shavkat Mirziyoyevning Yaponiyaga rasmiy tashrifi doirasidagi navbatdagi muhim manzili Nagoya universiteti bo‘ldi, deb yozmoqda Prezident matbuot xizmati.
Nagoya universiteti dunyodagi eng nufuzli ilm-fan va ta’lim maskanlaridan, qit’adagi o‘nta eng namunali oliy ta’lim dargohlaridan biri bo‘lib, unda dunyoga mashhur ko‘plab olimlar ta’lim olgan va mehnat qilmoqda, bu yerdan fizika va kimyo fanlari bo‘yicha olti nafar Nobel mukofoti sovrindorlari yetishib chiqqan.
Bugungi kunda universitetda 16 mingdan ziyod talaba tahsil oladi. Shundan 2,6 ming nafari xorijiy mamlakatlar, 30 nafardan ortig‘i nafari O‘zbekiston yoshlaridir. Hozirga qadar mazkur universitetda 400 dan ortiq o‘zbekistonlik talaba va tadqiqotchi tahsil olgan.
O‘zAning yozishicha, Yaponiyada tahsil olayotgan o‘zbekistonlik ushbu talabalarga Prezident sovg‘alari — zamonaviy kompyuterlar topshirildi.
Prezident matbuot xizmati xabarda qayd etilishicha, 2010-yilda Toshkentda Nagoya universitetining vakolatxonasi ochilgan bo‘lib, bugungi kunda mazkur vakolatxona O‘zbekiston oliy o‘quv yurtlari uchun ta’lim va ilmiy tadqiqotlar sohasida ko‘prik vazifasini o‘tamoqda. Bevosita universitet ishtirokida ikki mamlakatda muntazam o‘tkazilayotgan O‘zbekiston—Yaponiya talabalar akademik forumi va oliy o‘quv yurtlari rektorlarining an’anaviy konferensiyalari ilmiy hayotda katta rol o‘ynamoqda.
Davlat rahbari universitet faoliyati bilan tanishdi, uning prezidenti Seyichi Matsuo bilan uchrashdi. Uchrashuvda Nobel mukofoti sovrindorlari va boshqa olimlar ishtirok etdi.
“Sizning yurtimizga ilmiy hamkorligimizni rivojlantirish borasida qilayotgan katta xizmatlaringizni alohida qadrlaymiz. Ayniqsa, o‘tgan yili Nobel mukofoti sovrindori professor Ryoji Noyori janoblari bilan birgalikda O‘zbekistonga tashrifingiz mamlakatimiz ilmiy hayotida muhim voqea bo‘ldi”, — degan Shavkat Mirziyoyev.
Seyichi Matsuoning O‘zbekiston ilm-fani rivojiga munosib hissa qo‘shib kelayotganini e’tiborga olib, yaqinda Toshkent davlat texnika universiteti ilmiy kengashi uni universitetning faxriy rektori etib sayladi. Shuningdek, O‘zbekiston Fanlar akademiyasi professor Noyoriga faxriy akademik unvoni berildi.
Uchrashuvda Prezident Seyichi Matsuo va Ryoji Noyorini ushbu unvonlar bilan tabrikladi. Shuningdek, akademik almashinuvlarni faollashtirish hamda hamkorlikning ustuvor yo‘nalishlarida qo‘shma ilmiy tadqiqotlarni amalga oshirishga kelishib olindi.
Eslatib o‘tamiz, Shavkat Mirziyoyev Yaponiya Bosh vaziri Sindzo Abening taklifiga binoan rasmiy tashrif bilan 17-dekabr kuni Yaponiyaga keldi. Prezidentni Tyubu xalqaro aeroportida Shavkat Mirziyoyevni Yaponiya rasmiy doiralari vakillari kutib oldi. Tashrif 17-dekabrdan 20-dekabrgacha davom etishi va qiymati 6,5 milliard dollarga teng bo‘lgan 48 ta kelishuv va shartnoma imzolanishi kutilmoqda.
Shavkat Mirziyoyevning rasmiy tashrifi doirasida Yaponiyaning yirik shaharlaridagi LED-ekranlarda O‘zbekistonning turistik salohiyati namoyish etilmoqda.
Izoh (0)