Президент Шавкат Мирзиёевнинг Японияга расмий ташрифи доирасидаги навбатдаги муҳим манзили Нагоя университети бўлди, деб ёзмоқда Президент матбуот хизмати.
Нагоя университети дунёдаги энг нуфузли илм-фан ва таълим масканларидан, қитъадаги ўнта энг намунали олий таълим даргоҳларидан бири бўлиб, унда дунёга машҳур кўплаб олимлар таълим олган ва меҳнат қилмоқда, бу ердан физика ва кимё фанлари бўйича олти нафар Нобел мукофоти совриндорлари етишиб чиққан.
Бугунги кунда университетда 16 мингдан зиёд талаба таҳсил олади. Шундан 2,6 минг нафари хорижий мамлакатлар, 30 нафардан ортиғи нафари Ўзбекистон ёшларидир. Ҳозирга қадар мазкур университетда 400 дан ортиқ ўзбекистонлик талаба ва тадқиқотчи таҳсил олган.
ЎзАнинг ёзишича, Японияда таҳсил олаётган ўзбекистонлик ушбу талабаларга Президент совғалари — замонавий компьютерлар топширилди.
Президент матбуот хизмати хабарда қайд этилишича, 2010 йилда Тошкентда Нагоя университетининг ваколатхонаси очилган бўлиб, бугунги кунда мазкур ваколатхона Ўзбекистон олий ўқув юртлари учун таълим ва илмий тадқиқотлар соҳасида кўприк вазифасини ўтамоқда. Бевосита университет иштирокида икки мамлакатда мунтазам ўтказилаётган Ўзбекистон—Япония талабалар академик форуми ва олий ўқув юртлари ректорларининг анъанавий конференциялари илмий ҳаётда катта рол ўйнамоқда.
Давлат раҳбари университет фаолияти билан танишди, унинг президенти Сейичи Матсуо билан учрашди. Учрашувда Нобел мукофоти совриндорлари ва бошқа олимлар иштирок этди.
«Сизнинг юртимизга илмий ҳамкорлигимизни ривожлантириш борасида қилаётган катта хизматларингизни алоҳида қадрлаймиз. Айниқса, ўтган йили Нобел мукофоти совриндори профессор Рёжи Ноёри жаноблари билан биргаликда Ўзбекистонга ташрифингиз мамлакатимиз илмий ҳаётида муҳим воқеа бўлди», — деган Шавкат Мирзиёев.
Сейичи Матсуонинг Ўзбекистон илм-фани ривожига муносиб ҳисса қўшиб келаётганини эътиборга олиб, яқинда Тошкент давлат техника университети илмий кенгаши уни университетнинг фахрий ректори этиб сайлади. Шунингдек, Ўзбекистон Фанлар академияси профессор Ноёрига фахрий академик унвони берилди.
Учрашувда Президент Сейичи Матсуо ва Рёжи Ноёрини ушбу унвонлар билан табриклади. Шунингдек, академик алмашинувларни фаоллаштириш ҳамда ҳамкорликнинг устувор йўналишларида қўшма илмий тадқиқотларни амалга оширишга келишиб олинди.
Эслатиб ўтамиз, Шавкат Мирзиёев Япония Бош вазири Синдзо Абэнинг таклифига биноан расмий ташриф билан 17 декабрь куни Японияга келди. Президентни Тюбу халқаро аэропортида Шавкат Мирзиёевни Япония расмий доиралари вакиллари кутиб олди. Ташриф 17 декабрдан 20 декабргача давом этиши ва қиймати 6,5 миллиард долларга тенг бўлган 48 та келишув ва шартнома имзоланиши кутилмоқда.
Шавкат Мирзиёевнинг расмий ташрифи доирасида Япониянинг йирик шаҳарларидаги LED-экранларда Ўзбекистоннинг туристик салоҳияти намойиш этилмоқда.
Изоҳ (0)