Chiroqchi tumanining Dursun qishlog‘ida aholiga 20 yil davomida xizmat ko‘rsatib kelgan suv-ariq beparvolik sabab bugun yaroqsiz holga kelgan. Ariqdan suv keltirib ichgan 150 dan ortiq xonadon bugun tomorqasidan daromad ololmayapti. 31 gektar yeri hujjatda suvli maydon sifatida qayd etilgan fermer esa g‘allani sotib olib rejasini bajarmoqda.
— Bu ariqdan kelayotgan suv Dursun hamda Zum qishlog‘i aholisining tomorqasini sug‘orardi, — deydi aholi vakillaridan biri Turkman Norqulov. — Qishlog‘imizda 3350 nafar aholi istiqomat qiladi. Mavjud 678 ta xonadondan 50 dan ortig‘i tomorqadan daromad ko‘radi. Zum qishlog‘idagi 619 ta xonadonning 100 ga yaqini tomorqa sug‘oradi. 150 dan ortiq xonadon bugun suvsiz o‘tiribdi. Tomorqadan daromad qilolmayapti. Prezidentimiz tomorqadan unumli foydalanish haqida ko‘p marotaba takrorlasalar-da, tuman mas’ullari aholining suvga bo‘lgan ehtiyojini arzimas sabablar bilan e’tibordan chetda qoldirmoqda.
— 2018-yil o‘z mablag‘imdan 21 million so‘m sarflab, g‘allani boshqa fermerdan sotib oldim va rejani bajardim, — deydi “Berdiyev Eshmamat Berdiyevich” fermer xo‘jaligi rahbari Eshmamat Berdiyev. — Sababi mening ixtiyorimdagi 191 gektar yerning 31 gektari hujjatlarda suvli maydon sifatida ko‘rsatilgan. Shu boisdan ham o‘sha yerdan olinadigan hosilimni suvli maydon rejasi bo‘yicha topshiraman. Aslida esa, o‘sha 31 gektar yerga suv bormayotganiga 7 yil bo‘ldi. 7 yildan beri g‘allani sotib olib, davlat rejasini bajarib kelyapman.
Aholi vakillarining aytishicha, suv-ariqning qishloqqa kirish qismi o‘pirilib, jarliklar yuzaga kelgan. Eski anhor kanalidan kelayotgan suv o‘sha jarliklar sabab aholigacha yetib bormayapti.
— Bizda suv muammo emas, faqatgina ariqqa e’tibor qaratilib, o‘pirilib tushgan joylari ta’mirlansa, ariq yo‘li tozalansa, muammo ariydi, — deydi aholi vakillaridan yana biri Toshpo‘lat Bo‘ronov. — Qishloqdoshlar hashar yo‘li bilan qilamiz desak, o‘pirilib tushgan joylariga texnika yordami kerak. Qolaversa, shu ariqdan katta fermer xo‘jaliklari, bog‘ ham suv ichish umidida. Fermer davlatga suv bormaydigan yer uchun suvli maydon rejasini bajarib, g‘alla topshiryapti-ku.
Fermer Eshmamat Berdiyevning ma’lumot berishicha, fermer bu muammo bilan tuman hokimligi-yu, viloyat tashkilotlari hatto viloyatning sobiq rahbari Zafar Ro‘ziyev qabulida ham bo‘lgan. Unga taqdim etilgan javob xatlarida yozilishicha, fermerning hujjatlarda suvli yer sifatida qayd etilgan, ammo amalda suvsizlikdan qaqrab yotgan yerlariga borgan suv-ariq 2019-yil ta’mirlab beriladi. Biroq, joriy yil yakunlanayapti-ki, ta’mirlash ishlaridan darak yo‘q.
— 2012-yil yaxshi niyat bilan 10 gektar maydonda bog‘ yaratgandik, mevali daraxtlar ekib ancha parvarishladik, biroq suvsizlik sabab bugungi kunda daraxtlarimiz nobud bo‘lmoqda, — deydi bog‘bonlikni kasb qilgan Berdimurod Boboqulov. — 2012 yilgacha yaxshigina suv kelardi. Ammo keyinchalik e’tibor susaydi va shu ahvolga kelib qoldik.
Fermer Eshmamat Berdiyevning ta’kidlashicha, viloyat hokimining sobiq o‘rinbosari Baxtiyor Rajabov mutasaddilarga fermer yeri uchun suv keltirib berish topshirig‘ini bergan, ammo e’tiborsiz rahbarlar sabab muammo haligacha hal etilmay qolmoqda.
Qishloq ahlining “Daryo” muxbiriga qo‘shimcha qilishicha, qishloqdagi ichki yo‘llar ahvoli ham o‘ta qoniqarsiz. Ta’bir joiz bo‘lsa, ahvoliga maymunlar yig‘laydi.
Kutamiz, mutasaddilar ne derkin?
Izoh (0)