Чироқчи туманининг Дурсун қишлоғида аҳолига 20 йил давомида хизмат кўрсатиб келган сув-ариқ бепарволик сабаб бугун яроқсиз ҳолга келган. Ариқдан сув келтириб ичган 150 дан ортиқ хонадон бугун томорқасидан даромад ололмаяпти. 31 гектар ери ҳужжатда сувли майдон сифатида қайд этилган фермер эса ғаллани сотиб олиб режасини бажармоқда.
— Бу ариқдан келаётган сув Дурсун ҳамда Зум қишлоғи аҳолисининг томорқасини суғорарди, — дейди аҳоли вакилларидан бири Туркман Норқулов. — Қишлоғимизда 3350 нафар аҳоли истиқомат қилади. Мавжуд 678 та хонадондан 50 дан ортиғи томорқадан даромад кўради. Зум қишлоғидаги 619 та хонадоннинг 100 га яқини томорқа суғоради. 150 дан ортиқ хонадон бугун сувсиз ўтирибди. Томорқадан даромад қилолмаяпти. Президентимиз томорқадан унумли фойдаланиш ҳақида кўп маротаба такрорласалар-да, туман масъуллари аҳолининг сувга бўлган эҳтиёжини арзимас сабаблар билан эътибордан четда қолдирмоқда.
— 2018 йил ўз маблағимдан 21 миллион сўм сарфлаб, ғаллани бошқа фермердан сотиб олдим ва режани бажардим, — дейди «Бердиев Эшмамат Бердиевич» фермер хўжалиги раҳбари Эшмамат Бердиев. — Сабаби менинг ихтиёримдаги 191 гектар ернинг 31 гектари ҳужжатларда сувли майдон сифатида кўрсатилган. Шу боисдан ҳам ўша ердан олинадиган ҳосилимни сувли майдон режаси бўйича топшираман. Аслида эса, ўша 31 гектар ерга сув бормаётганига 7 йил бўлди. 7 йилдан бери ғаллани сотиб олиб, давлат режасини бажариб келяпман.
Аҳоли вакилларининг айтишича, сув-ариқнинг қишлоққа кириш қисми ўпирилиб, жарликлар юзага келган. Эски анҳор каналидан келаётган сув ўша жарликлар сабаб аҳолигача етиб бормаяпти.
— Бизда сув муаммо эмас, фақатгина ариққа эътибор қаратилиб, ўпирилиб тушган жойлари таъмирланса, ариқ йўли тозаланса, муаммо арийди, — дейди аҳоли вакилларидан яна бири Тошпўлат Бўронов. — Қишлоқдошлар ҳашар йўли билан қиламиз десак, ўпирилиб тушган жойларига техника ёрдами керак. Қолаверса, шу ариқдан катта фермер хўжаликлари, боғ ҳам сув ичиш умидида. Фермер давлатга сув бормайдиган ер учун сувли майдон режасини бажариб, ғалла топширяпти-ку.
Фермер Эшмамат Бердиевнинг маълумот беришича, фермер бу муаммо билан туман ҳокимлиги-ю, вилоят ташкилотлари ҳатто вилоятнинг собиқ раҳбари Зафар Рўзиев қабулида ҳам бўлган. Унга тақдим этилган жавоб хатларида ёзилишича, фермернинг ҳужжатларда сувли ер сифатида қайд этилган, аммо амалда сувсизликдан қақраб ётган ерларига борган сув-ариқ 2019 йил таъмирлаб берилади. Бироқ, жорий йил якунланаяпти-ки, таъмирлаш ишларидан дарак йўқ.
— 2012 йил яхши ният билан 10 гектар майдонда боғ яратгандик, мевали дарахтлар экиб анча парваришладик, бироқ сувсизлик сабаб бугунги кунда дарахтларимиз нобуд бўлмоқда, — дейди боғбонликни касб қилган Бердимурод Бобоқулов. — 2012 йилгача яхшигина сув келарди. Аммо кейинчалик эътибор сусайди ва шу аҳволга келиб қолдик.
Фермер Эшмамат Бердиевнинг таъкидлашича, вилоят ҳокимининг собиқ ўринбосари Бахтиёр Ражабов мутасаддиларга фермер ери учун сув келтириб бериш топшириғини берган, аммо эътиборсиз раҳбарлар сабаб муаммо ҳалигача ҳал этилмай қолмоқда.
Қишлоқ аҳлининг «Дарё» мухбирига қўшимча қилишича, қишлоқдаги ички йўллар аҳволи ҳам ўта қониқарсиз. Таъбир жоиз бўлса, аҳволига маймунлар йиғлайди.
Кутамиз, мутасаддилар не деркин?
Изоҳ (0)