Toshkentda TV orqali jonli efirda ko‘rsatilayotgan saylov debati elektr o‘chgani sabab uzilib qoldi

Xalqaro press-klubning 27-noyabr kuni Markaziy saylov komissiyasining Toshkent shahar Shayxontohur tumanida joylashgan Xalqaro matbuot markazida tashkil etilgan navbatdagi, jonli efir orqali efirga uzatilayotgan Press-koferensiyasi vaqtida elektr ta’minotida uzilish yuz berib, tadbir ishtirokchilari taxminan 5—7 daqiqa davomida chiroqsiz qolib ketgan.

Ushbu holat yuzasidan Xalqaro press-klub bosh prodyuseri G‘ulom Samadov “Daryo” muxbiriga bergan izohida ushbu holatni “energetika tizimi ma’murlarining saylov jarayonlariga munosabati” deb atadi.

Fikrimcha, Toshkent shahridagi elektr ta’minotiga mas’ul rahbarlar saylovlar jarayoni ketayotganini, saylov jarayonlari boshlanganini sezishi kerak. 20-sentabrdan beri Markaziy saylov komissiyasi Xalqaro matbuot markazida Xalqaro press-klub to‘g‘ridan to‘g‘ri efirga chiqyapti, mas’ullarning bundan xabari bor. Ular jonli efirni ko‘ryapti, “Yoshlar” radiokanali orqali tinglayapti.

Tadbir joyini muqobil energiya yoki boshqa zaxira bilan ta’minlashga ular mas’ul bo‘lishi kerak. Biz ularga elektr energiya bilan ta’minlab berishlarini so‘rab rasman murojaat qilmaganmiz. Shunday bo‘lsa-da, mutasaddilar mas’uliyatni his qilishi kerak. Bugun kuzatilgan elektr ta’minotidagi uzilish haqida ular bizni ogohlantirmagan. Buni energetika tizimining saylov jarayonlariga, umuman, siyosiy voqealarga munosabati, deyish mumkin.

G‘ulom Samadov, Xalqaro press-klub bosh prodyuseri