Janubiy Koreyada yashayotgan 2000 nafardan ortiq O‘zbekiston fuqarosi joriy yilning 22-dekabr kuni bo‘lib o‘tadigan Oliy Majlis Qonunchilik palatasi deputatligiga saylovda ishtirok etishi kutilmoqda. Bu haqda O‘zbekistonning Janubiy Koreyadagi elchisi Vitaliy Fen videokonferensiya shaklida o‘tkazilgan Markaziy saylov komissiyasining majlisida ma’lum qildi. Bu haqda Markaziy saylov komissiyasi matbuot xizmati xabar berdi.
Qayd etilgan 2000 kishidan 150 nafari Janubiy Koreyadagi diplomatik vakolatxonada doimiy ro‘yxatdan o‘tgan. Saylov tashviqotiga oid uchrashuvlarda 1000 nafardan ortiq o‘zbekistonlik, talaba yoshlar saylovda faol ishtirok etish istagini bildirgan.
26-noyabr, seshanba kuni bo‘lib o‘tgan Markaziy saylov komissiyasining navbatdagi kengaytirilgan majlisida Bandlik va mehnat munosabatlari vazirligi huzuridagi Tashqi mehnat migratsiyasi agentligining Moskva va Kvandju shaharlaridagi vakolatxonalarida qo‘shimcha saylov uchastkalarini tuzish va ularni tegishli saylov okruglariga biriktirish, Janubiy Koreyada ochilgan saylov uchastkalari faoliyatini tashkil etish masalalari ko‘rib chiqildi.
Shuningdek, kun tartibidan Oliy Majlis Qonunchilik palatasi saylovida xorijiy davlatlar va xalqaro tashkilotlardan qatnashadigan kuzatuvchilarni akkreditatsiya qilish, ommaviy axborot vositalari vakillarini akkreditatsiyadan o‘tkazish hamda Oliy Majlisi Qonunchilik palatasiga saylov o‘tkazuvchi 87-Angren okrug saylov komissiyasi tarkibiga o‘zgartirish kiritish masalalari o‘rin oldi.
Tashqi ishlar vazirligining taqdimnomasiga binoan, Tashqi mehnat migratsiyasi agentligining Moskva shahridagi vakolatxonasida 54-saylov uchastkasi va Kvandju shahridagi vakolatxonasida 55-saylov uchastkasi tuzildi. Moskva shahrida tuzilgan 54-saylov uchastkasi 145-Bodomzor saylov okrugiga, agentlikning Kvandju shahrida tuzilgan 55-saylov uchastkasi 146-Astrobod saylov okrugiga biriktirildi.
Qayd etilishicha, xorijdagi saylovchilar “saylov.mfa.uz” manzili orqali oldindan elektron ro‘yxatdan o‘tishi mumkin.
Ma’lum qilinishicha, bu yilgi saylovlarda Yevropada xavfsizlik va hamkorlik tashkilotiga a’zo bo‘lgan 57 ta davlatdan 250 nafarga yaqin qisqa muddatli, 30 nafar uzoq muddatli, shuningdek, boshqa davlat va xalqaro tashkilotlardan 300 ga yaqin, jami 600 nafardan ziyod kuzatuvchi ishtirok etishi kutilmoqda.
Majlisda Tashqi ishlar vazirligining taqdimnomasiga muvofiq MDH davlatlari missiyasidan 7 nafar va YeXHTning demokratik institutlar va inson huquqlari bo‘yicha byurosi missiyasining 42 nafar xalqaro kuzatuvchisi akkreditatsiyadan o‘tkazildi.
Izoh (0)