Жанубий Кореяда яшаётган 2000 нафардан ортиқ Ўзбекистон фуқароси жорий йилнинг 22 декабрь куни бўлиб ўтадиган Олий Мажлис Қонунчилик палатаси депутатлигига сайловда иштирок этиши кутилмоқда. Бу ҳақда Ўзбекистоннинг Жанубий Кореядаги элчиси Виталий Фен видеоконференция шаклида ўтказилган Марказий сайлов комиссиясининг мажлисида маълум қилди. Бу ҳақда Марказий сайлов комиссияси матбуот хизмати хабар берди.
Қайд этилган 2000 кишидан 150 нафари Жанубий Кореядаги дипломатик ваколатхонада доимий рўйхатдан ўтган. Сайлов ташвиқотига оид учрашувларда 1000 нафардан ортиқ ўзбекистонлик, талаба ёшлар сайловда фаол иштирок этиш истагини билдирган.
26 ноябрь, сешанба куни бўлиб ўтган Марказий сайлов комиссиясининг навбатдаги кенгайтирилган мажлисида Бандлик ва меҳнат муносабатлари вазирлиги ҳузуридаги Ташқи меҳнат миграцияси агентлигининг Москва ва Кванджу шаҳарларидаги ваколатхоналарида қўшимча сайлов участкаларини тузиш ва уларни тегишли сайлов округларига бириктириш, Жанубий Кореяда очилган сайлов участкалари фаолиятини ташкил этиш масалалари кўриб чиқилди.
Шунингдек, кун тартибидан Олий Мажлис Қонунчилик палатаси сайловида хорижий давлатлар ва халқаро ташкилотлардан қатнашадиган кузатувчиларни аккредитация қилиш, оммавий ахборот воситалари вакилларини аккредитациядан ўтказиш ҳамда Олий Мажлиси Қонунчилик палатасига сайлов ўтказувчи 87-Ангрен округ сайлов комиссияси таркибига ўзгартириш киритиш масалалари ўрин олди.
Ташқи ишлар вазирлигининг тақдимномасига биноан, Ташқи меҳнат миграцияси агентлигининг Москва шаҳридаги ваколатхонасида 54-сайлов участкаси ва Кванджу шаҳридаги ваколатхонасида 55-сайлов участкаси тузилди. Москва шаҳрида тузилган 54-сайлов участкаси 145-Бодомзор сайлов округига, агентликнинг Кванджу шаҳрида тузилган 55-сайлов участкаси 146-Астробод сайлов округига бириктирилди.
Қайд этилишича, хориждаги сайловчилар «saylov.mfa.uz» манзили орқали олдиндан электрон рўйхатдан ўтиши мумкин.
Маълум қилинишича, бу йилги сайловларда Европада хавфсизлик ва ҳамкорлик ташкилотига аъзо бўлган 57 та давлатдан 250 нафарга яқин қисқа муддатли, 30 нафар узоқ муддатли, шунингдек, бошқа давлат ва халқаро ташкилотлардан 300 га яқин, жами 600 нафардан зиёд кузатувчи иштирок этиши кутилмоқда.
Мажлисда Ташқи ишлар вазирлигининг тақдимномасига мувофиқ МДҲ давлатлари миссиясидан 7 нафар ва ЕХҲТнинг демократик институтлар ва инсон ҳуқуқлари бўйича бюроси миссиясининг 42 нафар халқаро кузатувчиси аккредитациядан ўтказилди.
Изоҳ (0)