Tanzila Norboyeva o‘zining Senat raisi etib saylanishi mutlaqo kutilmaganda yuz berganini, u ham boshqalar kabi Senat raisi dekabrda bo‘ladigan saylovlardan so‘ng o‘zgarishini kutganini ma’lum qildi. U bu haqda bloger Kirill Altmanning Alter Ego dasturiga bergan intervyusida aytib o‘tdi.
Albatta, men uchun ham katta bir kutilmagan holat bo‘ldi bu. Uzoq yillar jamoatchilik bilan ishlagan bo‘lsam-da. Bundan avval Xotin-qizlar qo‘mitasi raisi, bosh vazir o‘rinbosari sifatida ko‘proq jamoatchilik bilan ishlagan bo‘lsam, undan avval 6 yil mobaynida Kasaba uyushmalari federatsiyasi raisi bo‘lganman, bu ham jamoatchilik ishi, xalq ichida bo‘lganman. Vazifalarimni katta ishtiyoq, sermahsullik bilan bajarganman. O‘zimni ayamay ishlaganman, deb hisoblayman.Shunga qaramay, Senat raisi lavozimini egallash taklifi men uchun umuman kutilmagan holat bo‘ldi. Nimani kutsam ham, buni mutlaqo kutmaganman. Chunki tez orada yangi parlament saylovlari bo‘ladi, saylovlar oldidan bu taklifning berilishi mutlaqo kutilmagan holat edi. Agar kadrlarni almashtirish, Senat raisi, spiker yoki qo‘mitalarning boshqa raislarini saylash zarurati tug‘ilsa, bularning barchasi saylovlardan keyin yuz berishini kutamiz. Hamma shuni kutgan edi.
Taklifni haqiqatan ham katta minnatdorlik bilan qabul qildim. Senatorlarning barchasi nomzodimni bir ovozdan ma’qulladi, chunki ular xalq vakillari. Ular men uchun yangi odamlar emas, barchalari bilan bungacha hududlarda, ayniqsa, ijtimoiy yo‘nalishdagi, ayollar, mehnat munosabatlari bilan bog‘liq muammolarni hal etishda birga ishlaganman.
Boshqalar yuqori lavozimlarni egallash takliflarini rad etishganmi yoki yo‘q, bu menga qorong‘u. Ammo rad eta olishmaydi, degan gapga qo‘shilmayman. Istalgan odam rad qilishi mumkin.
Oshkora bo‘lmasa ham, qandaydir shaxsiy muammolari, salomatligi, oilaviy muammolari ishga to‘liq o‘zini bag‘ishlashiga imkon bermasligini aytishi mumkin. Rahbariyat, albatta, tushunib qabul qiladi. Rad etib bo‘lmaydi, degan gaplar noto‘g‘ri.
Tanzila Norboyeva, O‘zbekiston Senati raisi
Izoh (0)