Toshkent shahri va respublikaning har bir hududida 17—18-noyabr kunlari Milliy gvardiya harbiy otliq otryadlarining “O‘zbekiston Davlat bayrog‘i marshi” bo‘lib o‘tdi. Bu haqda “Daryo”ga Milliy gvardiya matbuot xizmati ma’lum qildi.
Qayd etilishicha, marshlar davomida otliqlar otryadi bilan bir qatorda avto va moto bo‘linmalar hamda velosportchilar ishtirokida bayroq baland ko‘tarilgan holda saf yurishlari o‘tkazildi.
Shuningdek, Jizzax davlat pedogogika instituti akademik litseyi binosida “Bayroqqa sadoqat — Vatanga sadoqat” shiori ostida litsey o‘qituvchilari hamda Jizzax viloyati bo‘yicha Milliy gvardiya boshqarmasi harbiy xizmatchi va xodimlaridan tashkil topgan jamoalar o‘rtasida maxsus viktorina o‘tkazildi. Jizzax viloyatining kirib kelish darvozasida esa harbiy xizmatchilar yordamida uzunligi 90 metr, eni 60 metr bo‘lgan davlat bayrog‘i namoyishi tashkil etildi.
Mavzuga doir: Bayroqlarni bir-biridan farqlay olasizmi? Geografiyadan necha bahoga o‘qigansiz o‘zi? Qani, bir test topshiring-chi!
Navoiy viloyatida Milliy gvardiya boshqarmasi hamda bo‘linmalari tomonidan “O‘zbekiston Respublikasi Davlat bayrog‘i — faxrim va g‘ururim” shiori ostida yoshlar ishtirokidagi she’rxonlik kechasi va badiiy dasturlarni o‘z ichiga olgan ma’naviy-ma’rifiy tadbirlar o‘tkazildi.
Mavzuga doir: Foto: O‘zbekiston bayrog‘i Kilimanjaro, Elbrus cho‘qqisi hamda dunyoning boshqa burchaklarida
Termiz shahrida esa “Bayrog‘imiz — faxrimiz, g‘ururimiz” mavzusida yoshlar o‘rtasida yugurish bo‘yicha marafon bo‘lib o‘tdi. Shu bilan birga Milliy gvardiyaning Surxondaryo viloyati bo‘yicha boshqarmasi va Qiziriq tumani hokimligi hamkorligida “Davlat bayrog‘i — mening iftixorim!” shiori ostida tumandagi ta’lim muassasalari o‘quvchilari va mahallalardagi vaqtincha ishsiz yoshlar ishtirokida sportning bir qator turlari bo‘yicha musobaqa o‘tkazildi.
Bo‘lib o‘tgan bellashuvlardagi barcha g‘oliblar va tadbirlarning faol ishtirokchilari Milliy gvardiya boshqarmalari tomonidan munosib rag‘batlantirilgan.
Avvalroq O‘zbekistonda 18-noyabr—Bayroq qabul qilingan kun munosabati bilan piyoda yurish marafoni o‘tkazilgani, Registon maydoniga 100 ta bayroq o‘rnatilgani, Buxoroda Yoshlar markazi binosi ulkan bayroq bilan qoplangani haqida xabar berilgandi.
Izoh (0)