Ўзбекистон Туризмни ривожлантириш давлат қўмитаси «B-Tween» француз компанияси билан ҳамкорликда «Paris Premiere» телеканали учун ҳужжатли фильм тайёрлаш лойиҳаси доирасида франциялик актёр Жерар Депардье Қорақалпоғистонга ташриф буюрди. Бу ҳақда ЎзА хабар берди.
Бу фильмда француз актёри Жерар Депардье бош ролни ижро этади. Ўзбекистон тўғрисидаги ҳужжатли фильмни суратга олиш ишлари Ўзбекистоннинг олтита шаҳри — Тошкент, Самарқанд, Бухоро, Хива, Термиз ва Нукусда шу йилнинг 6—26 ноябрь кунлари бўлиб ўтади.
Хабар берилишича, 18 ноябрь куни Жерар Депардье Қорақалпоғистонга келди. Элликқалъа туманида меҳмон тантанали кутиб олинди. Сўнг фильм ижодкорлари Аёзқалъа тарихий обидасига ташриф буюрди.
«Жерар Депардье саёҳати» номли фильмда бош ролни ижро этаётган актёрнинг тасвирга олиш ишлари Нукусдаги Савитский музейида ҳам давом этди.
«Қорақалпоғистонда умуман бошқача кенглик мавжуд ва бу диёрнинг саҳролари одамга ўзгача куч бағишлайди, — дейди актёр Жерар Депардье. – Энг асосийси Нукусдаги Савитский музейида бутунжаҳон аҳамиятга эга санъат асарлари тўпланган. Игор Савитский қийин замонларда, ўзига жуда хавфли бўлиб турган бир пайтларда ушбу асарларни сақлаб қолгани таҳсинга сазовордир».
Айни пайтда Жерар Депардье фильмнинг кейинги қисмларида суратга тушиш учун Орол денгизига жўнаб кетган.
Аввалроқ Жерар Депардье Ўзбекистоннинг Франциядаги туризм элчиси этиб тайинланган эди. Шунингдек, Тошкентдаги ислом цивилизацияси марказида Жерар Депардье билан учрашув бўлиб ўтган, сўнг француз актёри Бухородаги «Пойи Калон» мажмуасида бўлиб, ушбу маданий мерос объектини томоша қилган. Кейин эса у Хивага ташриф буюрган эди.
Изоҳ (0)