Bag‘dodda va Iroqning boshqa viloyatlarida mamlakatda davom etayotgan norozilik namoyishlarining kuchaygani sabab internet o‘chirib qo‘yildi. Bu haqda “TASS” xabar berdi.
Xabarga ko‘ra Bag‘dod, Basra, Karbalo va boshqa shaharlarda yashovchi millionlab odamlar butunjahon xalqaro tarmog‘idan uzilib qolgan. Internet o‘chirib qo‘yilgan hududlar qamrovi avvalgidan kengaygan va 1-oktabrda boshlangan namoyishlardan beri mamlakat shimolidagi kurdlar joylashgan hududlardan tashqari barcha yerlarda internet o‘chgan.
Iroqdagi hukumatga qarshi namoyishlar 1-oktabrda boshlangan. 2-oktabrda Iroq hududining 75 foiz qismida internet o‘chirib qo‘yilgan va 11-oktabrda qayta ishga tushirilgandi. Iroqdagi namoyishlarning birinchi bosqichida kuchishlatar tizim hamda xalq o‘rtasidagi to‘qnashuvlar natijasida 157 nafar odam: 149 nafar fuqaro va 8 nafar xavfsizlik xizmati xodimlari halok bo‘lgan, qariyb 3,5 ming odam turli darajadagi tan jarohatlari olgan.Ma’lum vaqt tanaffusdan so‘ng yana qayta boshlangan noroziliklarda politsiya hamda xalq o‘rtasida kuchli to‘qnashuvlar kuzatilmoqda. Namoyishchilar viloyatlardagi siyosiy partiyalar ofislari, mahalliy hokimliklar va diplomatik vakolatxonalar binolarini yoqishga uringani va ularning ayrimlariga o‘t qo‘ygani, Iroqdagi namoyishlarda halok bo‘lganlar soni 250 nafardan oshgani xabar qilingan. Al Sumaria telekanali ma’lumotiga ko‘ra internetni o‘chirib qo‘yish Iroq hukumatiga 1 milliard AQSh dollariga tushgan.
Izoh (0)