Ўзбекистонда 2019 йилнинг дастлабки тўққиз ойи давомида маст ҳолда автомобиль бошқариш билан боғлиқ 25 120 та қоидабузарлик қайд этилган бўлиб, маст ҳолда машина ҳайдаган 12 778 ҳайдовчининг иши судга оширилган.
ИИВ Ахборот хизматидан «Дарё»га маълум қилишларича, маъмурий судлар қарорларига асосан ушбу ҳайдовчиларнинг 8 639 нафари (67,6 фоизи) ҳайдовчилик ҳуқуқидан маҳрум этилган, 795 нафарига эса маъмурий қамоқ жазоси тайинланган.
Бу каби қоидабузарликларга қарши кураш самарадорлигини ошириш мақсадида Соғлиқни сақлаш ва Ички ишлар вазирликлари, Олий суд ва Бош прокуратура 2018 йил декабрида «Транспорт воситалари ҳайдовчиларининг маст ҳолатда эканлигини аниқлаш тартиби тўғрисидаги низомни тасдиқлаш ҳақида»ги қўшма қарорни имзолаган.
Қарорга мувофиқ текширув ишлари алкотестер мосламаси ёрдамида амалга оширилмоқда. Алкотестер — ҳайдовчи томонидан ҳавога чиқарилган этанол буғларини аниқловчи ва текширув натижаларини қоғозда акс эттирувчи махсус техник воситадир.
Текширув чоғида ҳайдовчи томонидан ҳавога чиқарилган этанол буғлари концентрацияси кўрсаткичи 0,135 миллиграмм ва ундан юқори бўлган ҳолларда йўл назоратчиси томонидан Маъмурий жавобгарлик тўғрисидаги кодексининг 131-моддасига мувофиқ маъмурий баённома расмийлаштирилади ҳамда транспорт воситаси вақтинчалик жарима майдонига қўйилади.
Маъмурий жавобгарлик тўғрисидаги кодекснинг 131-моддаси 1-қисмига (транспорт воситаларини маст ҳолда бошқариш) мувофиқ, транспорт воситасини бошқариш ҳуқуқидан бир йилу олти ойдан уч йилгача муддатга маҳрум қилиб, энг кам иш ҳақининг 25 баравари (1 ноябрь ҳолатига — 5 575 000 сўм) миқдорида жарима солишга сабаб бўлади.
Изоҳ (0)