Namanganda Respublika Ma’naviyat va ma’rifat markazi, “Ma’rifat” targ‘ibotchilar jamiyati, viloyat hokimligi va boshqa hamkor tashkilotlar ko‘magida tashkillangan “Ma’naviyat festivali” bo‘lib o‘tdi. Bu haqda “Daryo” muxbiri Azizbek Abduvaliyev xabar bermoqda.
Dastlab Namangan shahridagi “Oydin plaza” mehmonxonasida ma’rifiy haftalik doirasidagi festivalning ochilishiga bag‘ishlangan matbuot anjumani bo‘lib o‘tdi. Unda ushbu tadbir o‘zbek tiliga davlat tili maqomi berilganining 30 yilligi tantanalari bilan uyg‘un holda o‘tayotgani ta’kidlandi. “Ma’rifat” targ‘ibotchilar jamiyatining viloyatdagi a’zolariga guvohnomalar va ko‘krak nishonlari topshirildi.
Festivalning keyingi manzili To‘raqo‘rg‘on tumani bo‘ldi. Bu yerdagi muhtasham madaniyat markazida “Tariximsan, taqdirimsan, kelajagimsan, ona tilim” deb nomlangan adabiy-ma’rifiy tadbir o‘tkazildi. Unda viloyat hokimining o‘rinbosari Faxriddin Matkarimov, O‘zbekiston xalq artisti Rajab Adashev, O‘zbekistonda xizmat ko‘rsatgan artist Barno Qodirova, aktyor Alisher Otaboyev qadimiy va boy o‘zbek tilining bugungi kundagi o‘rni haqidagi fikr-mulohazalari bilan o‘rtoqlashdi. Tadbir Bobur Bobomurod, Dilbar Bonu, Sodiq Sayhun va boshqa shoirlar ishtirokidagi mushoiraga ulandi.
Festival ishtirokchilari Ishoqxon to‘ra Ibrat majmuasida bo‘lib, buyuk alloma haykali poyiga gullar qo‘ydi. Ibrat nomidagi xorijiy tillarga ixtisoslashgan maktab-internat faoliyati bilan tanishdi. Ular uchun ochiq osmon ostidagi muzey — Axsikent arxeologik yodgorligiga sayohat tashkil etildi.
— Namanganda o‘zbek davlatchiligi tarixining uzviy qismi bo‘lgan qadimiy Axsikent yodgorliklarini ko‘rib, chinakamiga hayratga tushdim, — deydi shoir Bobur Bobomurod. — Hamyurtlarimiz o‘tmishda jahon tamaddunida yuksak mavqeni egallaganiga yana bir bor amin bo‘ldim. Xususan, o‘rta asrlarda barpo etilgan yerosti suv inshootlarining o‘zi ham shundan dalolat berib turibdi. Ochiq osmon ostidagi muzey yaratilayotgani juda quvonchli. Yaqin orada bu yerlar mahalliy va xorij sayyohlarining qadami uzilmaydigan manzilga aylanishiga shak-shubha yo‘q.
Festival Namangan shahridagi “Afsonalar vodiysi” bog‘ida “Obodlik ko‘ngildan boshlanadi” mavzusidagi ma’naviy-ma’rifiy tadbir bilan davom etdi. Bu yerda kitoblar ko‘rgazmasi va rasmlar tanlovi, taniqli san’atkor va adiblarning chiqishlari tashkil etildi. Ma’naviy-ma’rifiy sohada jonbozlik ko‘rsatgan faollar taqdirlandi, tadbirkor va fermerlar tomonidan maktablarga badiiy kitoblar taqdim etildi.
Shuningdek, “Ma’naviyat festivali” doirasida Alisher Navoiy nomidagi viloyat musiqali drama tetrida “Sohibqiron Amir Temur yoxud adolat qilichi” nomli spektakl namoyish etildi.
Festival Chust tumanidagi madaniyat va istirohat bog‘ida “Ma’naviyatimizni shakllantirishda milliy urf-odat, an’ana va qadriyatlarimizning tutgan o‘rni” deb nomlangan davra suhbati bilan yakuniga yetdi. Bu yerda ishtirokchilarga Chustning nomini dunyoga mashhur qilgan do‘ppi va pichoqlar, ularni tayyorlash usullari namoyish etildi, folklor jamoalari chiqishlari namoyish etildi.
Izoh (0)