Наманганда Республика Маънавият ва маърифат маркази, «Маърифат» тарғиботчилар жамияти, вилоят ҳокимлиги ва бошқа ҳамкор ташкилотлар кўмагида ташкилланган «Маънавият фестивали» бўлиб ўтди. Бу ҳақда «Дарё» мухбири Азизбек Абдувалиев хабар бермоқда.
Дастлаб Наманган шаҳридаги «Ойдин плаза» меҳмонхонасида маърифий ҳафталик доирасидаги фестивалнинг очилишига бағишланган матбуот анжумани бўлиб ўтди. Унда ушбу тадбир ўзбек тилига давлат тили мақоми берилганининг 30 йиллиги тантаналари билан уйғун ҳолда ўтаётгани таъкидланди. «Маърифат» тарғиботчилар жамиятининг вилоятдаги аъзоларига гувоҳномалар ва кўкрак нишонлари топширилди.
Фестивальнинг кейинги манзили Тўрақўрғон тумани бўлди. Бу ердаги муҳташам маданият марказида «Тарихимсан, тақдиримсан, келажагимсан, она тилим» деб номланган адабий-маърифий тадбир ўтказилди. Унда вилоят ҳокимининг ўринбосари Фахриддин Маткаримов, Ўзбекистон халқ артисти Ражаб Адашев, Ўзбекистонда хизмат кўрсатган артист Барно Қодирова, актёр Алишер Отабоев қадимий ва бой ўзбек тилининг бугунги кундаги ўрни ҳақидаги фикр-мулоҳазалари билан ўртоқлашди. Тадбир Бобур Бобомурод, Дилбар Бону, Содиқ Сайҳун ва бошқа шоирлар иштирокидаги мушоирага уланди.
Фестиваль иштирокчилари Ишоқхон тўра Ибрат мажмуасида бўлиб, буюк аллома ҳайкали пойига гуллар қўйди. Ибрат номидаги хорижий тилларга ихтисослашган мактаб-интернат фаолияти билан танишди. Улар учун очиқ осмон остидаги музей — Ахсикент археологик ёдгорлигига саёҳат ташкил этилди.
— Наманганда ўзбек давлатчилиги тарихининг узвий қисми бўлган қадимий Ахсикент ёдгорликларини кўриб, чинакамига ҳайратга тушдим, — дейди шоир Бобур Бобомурод. — Ҳамюртларимиз ўтмишда жаҳон тамаддунида юксак мавқени эгаллаганига яна бир бор амин бўлдим. Хусусан, ўрта асрларда барпо этилган ерости сув иншоотларининг ўзи ҳам шундан далолат бериб турибди. Очиқ осмон остидаги музей яратилаётгани жуда қувончли. Яқин орада бу ерлар маҳаллий ва хориж сайёҳларининг қадами узилмайдиган манзилга айланишига шак-шубҳа йўқ.
Фестиваль Наманган шаҳридаги «Афсоналар водийси» боғида «Ободлик кўнгилдан бошланади» мавзусидаги маънавий-маърифий тадбир билан давом этди. Бу ерда китоблар кўргазмаси ва расмлар танлови, таниқли санъаткор ва адибларнинг чиқишлари ташкил этилди. Маънавий-маърифий соҳада жонбозлик кўрсатган фаоллар тақдирланди, тадбиркор ва фермерлар томонидан мактабларга бадиий китоблар тақдим этилди.
Шунингдек, «Маънавият фестивали» доирасида Алишер Навоий номидаги вилоят мусиқали драма тетрида «Соҳибқирон Амир Темур ёхуд адолат қиличи» номли спектакл намойиш этилди.
Фестиваль Чуст туманидаги маданият ва истироҳат боғида «Маънавиятимизни шакллантиришда миллий урф-одат, анъана ва қадриятларимизнинг тутган ўрни» деб номланган давра суҳбати билан якунига етди. Бу ерда иштирокчиларга Чустнинг номини дунёга машҳур қилган дўппи ва пичоқлар, уларни тайёрлаш усуллари намойиш этилди, фолклор жамоалари чиқишлари намойиш этилди.
Изоҳ (0)