“Hududgazta’minot” kompaniyasi isitish qurilmalarining dudburonlarini tekshirish bo‘yicha yo‘riqnoma e’lon qildi

Xorazm viloyati Yangiariq tumani, Ostona qishlog‘ida yashovchi 45 yoshli K.G‘., turmush o‘rtog‘i va 2 nafar farzandlari qo‘lbola isitish pechining yonida uxlab qolib, xona ichiga tarqalgan is gazidan zaharlanib, vafot etgani haqida xabar berilgan edi.

Havo haroratining pasayib borishi natijasida aholi tomonidan xonadonlardagi yoz mavsumida ishlamay turgan isitish jihozlari ishga tushiriladi. Lekin aksariyat hollarda fuqarolar tomonidan uskunalarni ishlatish yo‘riqnomasi talablari va texnika xavfsizligi qoidalariga amal qilinmasligi oqibatida kutilmagan ko‘ngilsiz hodisalar kelib chiqishi mumkin. “Hududgazta’minot” kompaniyasi ana shunday holatlarning oldini olish uchun isitish qurilmalarining dudburonlarini tekshirish bo‘yicha yo‘riqnoma berdi.

1. Dudburon yaroqliligini uskunani ishga tushirmasdan oldin ip, yengil qog‘oz (salfetka) bo‘lagini uskuna yondirgichi ostidagi va alangani ko‘rish tirqishlariga olib boriladi (rasmda № 2 va № 6). Agar havo oqimi ichkariga ip yoki qog‘ozni tortsa, dudburon tortishi qoniqarli holatda bo‘ladi. Aksincha bo‘lsa, dudburon tortishi qoniqarsiz hisoblanib, uskunani ishga tushirish qat’iy taqiqlanadi va darhol mutaxassisga murojaat qilish talab etiladi.
2. Agar uskuna ishga tushirilgan bo‘lsa, gugurt alangasini uskunaning yondirgichi ostidagi va alangani ko‘rish tirqishlariga olib boriladi. Agar alanga ichkariga qarab tortilsa, dudburon tortishi qoniqarli bo‘ladi. Aksincha, alanga tashqari tomonga harakat qilsa, dudburonda nosozlik yoki havo o‘tkazmaydigan qandaydir to‘siq mavjud. Bu holatda darhol gaz uskunasini jo‘mrakdan o‘chirish va 104 telefon raqami orqali bog‘lanib, mutaxassis chaqirish kerak. Mutaxassis tomonidan nosozlik bartaraf etilib, dudburon tortishi qoniqarli holatga keltirilmasdan oldin gaz uskunasini ishga tushirish qat’iy taqiqlanadi.