Uzbekistan Airways aviakompaniyasining “Nyu-York—Toshkent” yo‘nalishi qatnovi bilan parvoz qilgan yo‘lovchi samolyot bortida to‘polon qildi, deb xabar beradi aviakompaniya matbuot xizmati.
21-oktabr, dushanba kuni “Nyu-York—Toshkent” yo‘nalishi bo‘yicha parvoz amalga oshirgan HY102 qatnovini poytaxt aeroportida Transportda jamoat xavfsizligini ta’minlash boshqarmasi xodimlari kutib oldi.
Mast holatda bo‘lgan 51 yoshli erkak samolyot bortida to‘polon ko‘tarib, o‘z joyini egallash haqidagi tanbehlarga e’tibor bermasdan, uni tinchlantirmoqchi bo‘lgan bortkuzatuvchilarni va atrofda o‘tirgan yo‘lovchilarni haqorat qilgan.
“U o‘zining nojo‘ya harakatlari bilan parvoz xavfsizligini, shu bilan birga, barcha yo‘lovchilar va ekipajning hayotini xavf ostiga qo‘ydi. Qatnov yo‘lovchilari ekipajga yordam ko‘rsatdi va qoidabuzarni o‘rindiqqa bog‘lab qo‘yishga to‘g‘ri keldi. Toshkent shahriga yetib kelgandan so‘ng aviato‘polonchi O‘zbekiston Respublikasi Transportda jamoat xavfsizligini ta’minlash boshqarmasi xodimlariga topshirildi”, — deyiladi xabarda.
Uzbekistan Airways aviakompaniyasi matbuot xizmati yo‘lovchilardan “Yo‘lovchining havo kemasi ichidagi yurish-turish qoidalari” bilan tanishib chiqib, unga rioya qilishni so‘radi.
“Qatnov yo‘lovchilaridan noqulayliklar uchun uzr so‘rab, ekipajga ko‘rsatgan yordamlari uchun minnatdorchilik bildiramiz”, — deyiladi xabarda.
Izoh (0)