Ijtimoiy tarmoqlarda bloger Dima Qayum “samosud”ga uchragani videosi tarqaldi. Unda Rishtondagi yangi qurilayotgan bozorda bir guruh ayollar blogerni bozor buzilishida aybdor sanab, unga tahdid qilgani va telefonini sindirib tashlagani aks etgan. “Daryo” muxbiri Azizbek Abduvaliyev mazkur holatga oydinlik kiritish uchun Dima Qayum bilan bog‘landi.
“13-oktabr kuni senator Iqbol Mirzo Rishtonga kelib, bu yerdagi bozorda yangi quriladigan kutubxona uchun ramziy ma’noda g‘isht qo‘yib bergandi. Hamma to‘polon shundan keyin boshlandi. Ertasiga, ya’ni 14-oktabr kuni tushlikdan so‘ng bir guruh savdogarlar kelib, “bu yerda kutubxona qurmaysan, bozor kutubxona bo‘ladigan joy emas”, deb men bilan masala talashib ketishdi. Erkaklar bir chetda qolib, ayollar tortishishni boshladi. Ularni hammasini taniyman, oziq-ovqat, o‘yinchoq va boshqa mahsulotlar sotadigan ayollar. “Hali hech kim hech narsa qurmayapti, shunchaki g‘isht qo‘yilgani kutubxona bitdi degani emas”, deb tushuntirsam ham bo‘lmadi. Menga tashlanib, telefonim ekranini ham sindirishdi”, — deydi Dilshod Boltaboyev (Dima Qayumning asl ismi-sharifi shunday).Blogerning aytishicha, buzilgan bozordagi do‘koni 77 kvadrat metr bo‘lgan. Yangi bozordan unga joy ajratish bo‘yicha viloyat va tuman hokimlarining tegishli qarori chiqarilgan hamda unga 54 kvadrat metr joy tekkan.
“Eski buzilgan joy uchun 15 million so‘m pul berishdi. Bu pulning yoniga qo‘shib-chatib, kutubxona va kitob savdosi bilan shug‘ullanadigan do‘kon qurmoqchiman. Pechkachilik uyda ham bo‘lar. Bozorda bo‘lgan ishni ikki narsa bilan izohlash mumkin — tayyor joyidan, qaynab turgan qozonidan mahrum bo‘lgan savdogarlarning alamzadaligi va go‘yo bozorning boshidan, eng yaxshi yerdan menga joy berilgani”, — deydi Dima Qayum.
Dima Qayumning aytishicha, bo‘lib o‘tgan “samosud” yuzasidan Rishton tuman IIBga ariza qilgan. Ichki ishlar mutasaddilari unga bu holat bo‘yicha albatta chora ko‘rilishini va’da qilgan. Voqealar rivojini kuzatamiz.
Izoh (0)