Блогер Дима Қаюм ўзига нисбатан уюштирилган «самосуд» сабабларига изоҳ берди

Ижтимоий тармоқларда блогер Дима Қаюм «самосуд»га учрагани видеоси тарқалди. Унда Риштондаги янги қурилаётган бозорда бир гуруҳ аёллар блогерни бозор бузилишида айбдор санаб, унга таҳдид қилгани ва телефонини синдириб ташлагани акс этган. «Дарё» мухбири Азизбек Абдувалиев мазкур ҳолатга ойдинлик киритиш учун Дима Қаюм билан боғланди.

«13 октябрь куни сенатор Иқбол Мирзо Риштонга келиб, бу ердаги бозорда янги қуриладиган кутубхона учун рамзий маънода ғишт қўйиб берганди. Ҳамма тўполон шундан кейин бошланди. Эртасига, яъни 14 октябрь куни тушликдан сўнг бир гуруҳ савдогарлар келиб, «бу ерда кутубхона қурмайсан, бозор кутубхона бўладиган жой эмас», деб мен билан масала талашиб кетишди. Эркаклар бир четда қолиб, аёллар тортишишни бошлади. Уларни ҳаммасини танийман, озиқ-овқат, ўйинчоқ ва бошқа маҳсулотлар сотадиган аёллар. «Ҳали ҳеч ким ҳеч нарса қурмаяпти, шунчаки ғишт қўйилгани кутубхона битди дегани эмас», деб тушунтирсам ҳам бўлмади. Менга ташланиб, телефоним экранини ҳам синдиришди», — дейди Дилшод Болтабоев (Дима Қаюмнинг асл исми-шарифи шундай).

Блогернинг айтишича, бузилган бозордаги дўкони 77 квадрат метр бўлган. Янги бозордан унга жой ажратиш бўйича вилоят ва туман ҳокимларининг тегишли қарори чиқарилган ҳамда унга 54 квадрат метр жой теккан.

«Эски бузилган жой учун 15 миллион сўм пул беришди. Бу пулнинг ёнига қўшиб-чатиб, кутубхона ва китоб савдоси билан шуғулланадиган дўкон қурмоқчиман. Печкачилик уйда ҳам бўлар. Бозорда бўлган ишни икки нарса билан изоҳлаш мумкин — тайёр жойидан, қайнаб турган қозонидан маҳрум бўлган савдогарларнинг аламзадалиги ва гўё бозорнинг бошидан, энг яхши ердан менга жой берилгани», — дейди Дима Қаюм.

Дима Қаюмнинг айтишича, бўлиб ўтган «самосуд» юзасидан Риштон туман ИИБга ариза қилган. Ички ишлар мутасаддилари унга бу ҳолат бўйича албатта чора кўрилишини ваъда қилган. Воқеалар ривожини кузатамиз.