Davlat idoralari va tashkilotlarining ochiqligi hamda shaffofligini ta’minlash, shuningdek, O‘zbekiston Prezidentining besh tashabbusini qo‘llab-quvvatlash maqsadida Adliya vazirligi an’anaviy ochiq eshiklar kuni doirasida Family day loyihasini amalga oshirdi. Bu haqda Adliya vazirligi jamoatchilik bilan aloqalar bo‘limi “Daryo”ga ma’lum qildi.
Loyiha doirasida vazirlik xodimlarining oila a’zolari, farzandlari Adliya vazirligi markaziy apparati joylashgan binoga keldi. Mehmonlar uchun vazirlik binosiga ekskursiya tashkil etildi. Bolalar ota-onalarining ish o‘rinlariga o‘tirib, “Adliya xodimi qanday ishlaydi?” degan savolga javob topdi. Shuningdek, bolalar vazirlik hududida joylashgan “Adliya organlari tarixi” muzeyini ham tomosha qilib, O‘zbekiston adliya tizimi tarixi bilan yaqindan tanishdi.
Tadbirda bolalarning vazirlik rahbariyati bilan uchrashuvi ham bo‘lib o‘tdi. Samimiy va ko‘tarinki ruhda o‘tgan uchrashuvda yosh avlod vazirga o‘zlarini qiziqtirgan savollarni berdi, adliya organlari va huquqshunoslik haqida ko‘plab yangi ma’lumotlarni bilib oldi.
Bayram turli interaktiv o‘yinlar, intellektual viktorinalar bilan yanada boy mazmun kasb etdi. Viktorina g‘oliblariga vazirlikning esdalik sovg‘alari topshirildi.
Family day loyihasi yosh avlodni vatanparvarlik ruhida tarbiyalash, ularda adolat, tartib, qonun tushunchalariga yaqinlikni paydo qilish, shuningdek, huquq sohasiga qiziqish uyg‘otish maqsadida tashkil etildi.
Izoh (0)