Давлат идоралари ва ташкилотларининг очиқлиги ҳамда шаффофлигини таъминлаш, шунингдек, Ўзбекистон Президентининг беш ташаббусини қўллаб-қувватлаш мақсадида Адлия вазирлиги анъанавий очиқ эшиклар куни доирасида Family day лойиҳасини амалга оширди. Бу ҳақда Адлия вазирлиги жамоатчилик билан алоқалар бўлими «Дарё»га маълум қилди.
Лойиҳа доирасида вазирлик ходимларининг оила аъзолари, фарзандлари Адлия вазирлиги марказий аппарати жойлашган бинога келди. Меҳмонлар учун вазирлик биносига экскурсия ташкил этилди. Болалар ота-оналарининг иш ўринларига ўтириб, «Адлия ходими қандай ишлайди?» деган саволга жавоб топди. Шунингдек, болалар вазирлик ҳудудида жойлашган «Адлия органлари тарихи» музейини ҳам томоша қилиб, Ўзбекистон адлия тизими тарихи билан яқиндан танишди.
Тадбирда болаларнинг вазирлик раҳбарияти билан учрашуви ҳам бўлиб ўтди. Самимий ва кўтаринки руҳда ўтган учрашувда ёш авлод вазирга ўзларини қизиқтирган саволларни берди, адлия органлари ва ҳуқуқшунослик ҳақида кўплаб янги маълумотларни билиб олди.
Байрам турли интерактив ўйинлар, интеллектуал викториналар билан янада бой мазмун касб этди. Викторина ғолибларига вазирликнинг эсдалик совғалари топширилди.
Family day лойиҳаси ёш авлодни ватанпарварлик руҳида тарбиялаш, уларда адолат, тартиб, қонун тушунчаларига яқинликни пайдо қилиш, шунингдек, ҳуқуқ соҳасига қизиқиш уйғотиш мақсадида ташкил этилди.
Изоҳ (0)