Toshkent shahrida tadbirkorlik uchun yer olish auksion orqali amalga oshiriladigan bo‘ldi. Bu haqda Toshkent shahar hokimligi matbuot xizmati xabar berdi.
O‘zbekiston Prezidentining farmoniga muvofiq, 2018-yilning avgustidan Toshkent shahrida tadbirkorlarga eksperiment tariqasida to‘g‘ridan-to‘g‘ri muzokaralar orqali yer berish tartibi joriy qilingan edi. 2019-yilning avgustigacha 775 ta loyiha muhokama qilinib, ijobiy xulosa olingan.
775 nafar tadbirkorga yer ajratish bo‘yicha qaror qabul qilindi. 2019-yilning avgust oyida eksperiment tugadi va oktabrdan tadbirkorlik uchun yer olish auksion orqali amalga oshiriladigan bo‘ldi. Hozir bu borada tashkiliy ishlar olib borilmoqda.
“Bu yangi tajriba bo‘lib, bunday amaliyot avval qo‘llanilmagan. Toshkent shahridagi yerlar ochiq auksionga qo‘yiladi. Tadbirkorlik qilaman, yer kerak degan tadbirkor hokimiyatga, yagona darchaga va boshqa tashkilotlarga borishining hojati yo‘q. Endilikda uyida o‘tirgan joyida e.ijro auksion.uz portaliga kirib, ro‘yxatdan o‘tib, yer olish imkoniyati mavjud”, — deyiladi xabarda.
Auksionda yer sotishdan tushgan mablag‘lar maxsus jamg‘armaga jamlanadi va bu fond davlat va jamiyat ehtiyojlari uchun yer maydonlari zarur bo‘lganda buzilishga tushgan xonadonlar yoki binolar egalariga yetkazilgan zararni qoplash uchun, kompensatsiyasi sifatida sarf qilinadi. Yaqin kunlarda auksionga yerlar chiqarilishi boshlanadi. Auksionda ishtirok etish istagini bildirgan shaxslar o‘z hisob raqamiga kafolat summasi qo‘yishi kerak.
Hozirda Toshkent shahrida davlat mulki hisoblangan 48 ta obyektlar bo‘sh. Agar vazirlik va boshqa idoralar ulardan maqsadli foydalanmasa hamda tegishli choralarni ko‘rmasa, ular hokimiyat balansiga o‘tkaziladi va auksionga qo‘yiladi.
Izoh (0)