BMT xavfsizlik kengashiga a’zo besh davlat Turkiyadan Suriyadagi harakatlarni to‘xtatishni so‘radi

Birlashgan Millatlar Tashkiloti xavfsizlik kengashining a’zosi bo‘lgan besh Yevropa mamlakati Turkiyadan Suriya shimoli-sharqidagi harbiy harakatlarni to‘xtatishni so‘ramoqda. Bu haqda Suriya shimolidagi voqealar muhokamasiga bag‘ishlangan Xavfsizlik kengashi maslahatlashuvidan keyin Germaniyaning BMTdagi doimiy vakili Yurgen Shults ma’lum qildi, deya xabar qilgan “TASS”.

Shults “Yevropa beshligi” — Fransiya, Germaniya, Buyuk Britaniya, Belgiya va Polsha nomidan gapirar ekan, Estoniya ham ushbu beshlik fikrini qo‘llab-quvvatlayotganini qistirib o‘tdi.

Suriya shimoli-sharqidagi turk harbiy harakatlari amalga oshirilayotganidan tashvishdamiz. Turkiyani bir tomonlama harbiy operatsiyalarni to‘xtatishga chaqiramiz, ushbu harakatlar Anqaraning muammolarini hal etmaydi, aksincha tashvishini battar ko‘paytiradi.

Suriya shimoli-sharqidagi harbiy harakatlar hududdagi beqaror vaziyatni yanada keskinlashtiradi, mamlakat fuqarolari azob chekadi, Suriyadan Yevropaga qochayotgan qochoqlar soni ham ortadi. Turkiyaning bir tomonlama harbiy operatsiyasi IShIDga qarshi kurashda erishilgan muvaffaqiyatlarga ham salbiy ta’sir qiladi. Xalqaro koalitsiyaning mahalliy ishtirokchisi bo‘lgan “Suriya demokratik kuchlari”ga hujum natijasida Suriya shimoli-sharqidagi vaziyat beqarorlashadi, bu IShIDning qayta tug‘ilishiga sharoit yaratishi, mintaqa va Yevropa xavfsizligiga jiddiy xavf solishi mumkin.

Yurgen Shults, Germaniyaning BMTdagi doimiy vakili

Germaniyaning BMT dagi doimiy vakili Turkiya Suriya shimoli-sharqida tuzmoqchi bo‘lgan “xavfsiz hudud”da qochoqlarni ortga qaytarish uchun xalqaro me’yorlarga mos sharoit yaratilishiga ham shubhalari borligini aytib o‘tdi.

U yerdagi demografik jarayonni o‘zgartirishga qaratilgan har qanday urinish nojoiz harakat bo‘ladi. Yevropa ittifoqi aholining mahalliy boshqaruv huquqlari inkor etilayotgan hududlardagi vaziyatni barqarorlashtirishga o‘z vositalarini bermasligini ma’lum qilamiz.

Turkiya Yevropa ittifoqi uchun muhim hamkor, NATOdagi ittifoqchi va IShIDga qarshi kurash bo‘yicha xalqaro koalitsiya a’zosi. Hozir hududdagi inqirozni tugatish juda muhim ahamiyat kasb etadi va Turkiyaning suriyalik qochoqlar bilan vaziyatda o‘z o‘rniga ega ekanini yaxshi tushunamiz. Biz tomonlarning aholi vakillari himoyasini ta’minlashi va Suriya hududida ularga ijtimoiy yordam berishi tarafdorimiz.

Yurgen Shults, Germaniyaning BMTdagi doimiy vakili