Futbol bo‘yicha Yevro—2020 musobaqasi saralash bosqichi 7-turi doirasida 10-oktabr, payshanba kuni guruhlarda bir nechta o‘yinlar bo‘lib o‘tdi.
Foto: Twitter/@UEFAEURO
“C” guruhidan o‘rin olgan bahsda Ronald Kuman qo‘l ostidagi Niderlandiya terma jamoasi o‘z maydonida Shimoliy Irlandiya termasi bilan bahsga kirishdi.
Bellashuvda mehmon jamoa hujumchisi Josh Majennis (75) tomonidan urilgan golga niderlandiyaliklar Memfis Depay (80, 90) hamda Lyuk de Yong (90)ning gollari bilan javob qaytardi.
Shu tariqa Niderlandiya o‘z uyida kechgan bahsda Shimoliy Irlandiyani 3:1 hisobida mag‘lubiyatga uchratdi va muhim 3 ochkoga ega bo‘ldi.
Mazkur g‘alabadan so‘ng Niderlandiya ochkolari sonini 12 taga yetkazib oldi va guruhda yetakchilikni o‘z qo‘liga oldi. Shimoliy Irlandiya esa xuddi shuncha ochko jamg‘argan holda 3-o‘rinni egallab turibdi.
“C” guruhidagi holat:
Shu kuni “E” guruhida Zlatko Dalich boshchiligidagi Xorvatiya termasi Vengriyaga qarshi maydonga tushdi.
O‘yin davomida mezbon jamoa yetakchisi Luka Modrich (5) hisobni ochgan bo‘lsa, hujumchi Bruno Petkovich (24, 42) o‘z hisobiga 2 ta gol yozdirib qo‘ydi.
Natijada Xorvatiya Vengriyani 3:0 hisobida taslim qildi va 3 ochkoga ega bo‘ldi.
Ma’lumot uchun, xorvatiyaliklar 13 ochko to‘plab guruhda peshqadamlik qilmoqda. Vengriya esa 9 ochko bilan 3-o‘rinda bormoqda.
“E” guruhidagi vaziyat:
“I” guruhida esa Roberto Martines boshliq Belgiya terma jamoasi o‘z uyida San Marinoni sinovdan o‘tkazdi.
Uchrashuv davomida Belgiya termasi vakillari Romelu Lukaku (28, 41), Nosir Shadli (31), Yuri Tilemans (45), Kristian Benteke (79), Yari Versxaren (84, penalti) va Timoti Kastan (90) birin-ketin raqib darvozasini ishg‘ol qilgan bo‘lsa, mehmon jamoa a’zolari Kristian Brolli (35) hamda Andrea Grandoni (43) avtogol muallifiga aylandi.
Shu tariqa Belgiya San Marino darvozasiga javobsiz 9 ta gol urib, yirik hisobda g‘alaba qozondi.
Qayd etish joiz, belgiyaliklar 21 ochko jamg‘arib guruhda birinchi o‘rinni band qilib turibdi. So‘nggi o‘rinda borayotgan San Marino esa birorta ham ochko yig‘a olmadi.
“I” guruhidagi holat:
Yevro—2020
Saralash bosqichi
7-tur bahslari
10-oktabr, payshanba
“C” guruhi
Belarus—Estoniya 0:0
Niderlandiya—Shimoliy Irlandiya 3:1
Gollar: 0:1 — 75 Majennis, 1:1 — 80 Depay, 2:1 — 90 de Yong, 3:1 — 90 Depay
“E” guruhi
Xorvatiya—Vengriya 3:0
Gollar: 1:0 — 5 Modrich, 2:0 — 24 Petkovich, 3:0 — 42 Petkovich
Slovakiya—Uels 1:1
Gollar: 0:1 — 25 Mur, 1:1 — 53 Kutska
“G” guruhi
Avstriya—Isroil 3:1
Gollar: 0:1 — 34 Zaxavi, 1:1 — 41 Lazaro, 2:1 — 56 Xinteregger, 3:1 — 88 Zabitser
Shimoliy Makedoniya—Sloveniya 2:1
Gollar: 1:0 — 50 Elmaz, 2:0 — 68 Elmaz, 2:1 — 90, penalti Ilichich
Latviya—Polsha 0:3
Gollar: 0:1 — 9 Levandovski, 0:2 — 13 Levandovski, 0:3 — 76 Levandovski
“I” guruhi
Qozog‘iston—Kipr 1:2
Gollar: 1:0 — 34 Yerlanov, 1:1 — 73 Soteriu, 1:2 — 84 Ioannu
Belgiya—San Marino 9:0
Gollar: 1:0 — 28 Lukaku, 2:0 — 31 Shadli, 3:0 — 35, avtogol Brolli, 4:0 — 41 Lukaku, 5:0 — 43, avtogol Grandoni, 6:0 — 45 Tilemans, 7:0 — 79 Benteke, 8:0 — 84, penalti Versxaren, 9:0 — 90 Kastan
Rossiya—Shotlandiya 4:0
Gollar: 1:0 — 57 Dzyuba, 2:0 — 60 Ozdoyev, 3:0 — 70 Dzyuba, 4:0 — 84 Golovin
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @daryo_sport’ga obuna bo‘ling!
