Innovatsion rivojlanish vaziri Ibrohim Abdurahmonov Jahon bankining Yevropa va Markaziy Osiyo moliya, raqobatbardoshlik va innovatsiyalar bo‘yicha global amaliyoti rahbari Marializa Motta boshchiligidagi delegatsiyani qabul qildi. Bu haqda Innovatsion rivojlanish vazirligi matbuot xizmati “Daryo”ga ma’lum qildi.
Uchrashuvda O‘zbekiston ilm-fanini tijoratlashtirish loyihasi muhokama qilindi. Mazkur loyiha 3 komponentdan iborat. 1-komponent 5 million AQSh dollari qiymatiga ega bo‘lib, loyihani boshqarish guruhini yaratish va qo‘llab-quvvatlash hamda tanlov bo‘yicha xalqaro kengashni tashkil etishga qaratilgan. Tomonlar loyihaga tayyorgarlik ko‘rish masalasiga to‘xtalib, tahliliy va texnik-iqtisodiy loyihalashtirish, loyiha ijrosini boshqarish, korrupsiyaga qarshi tadbirlar rejasi, moliyaviy boshqaruv, monitoring tizimini tashkil etish kabi jihatlarga alohida ahamiyat qaratdi.
30 million AQSh dollari miqdoridagi 2-komponent O‘zbekistondagi ilmiy-texnik tadqiqotlar hamda ishlanmalarni yanada barqaror va zamonaviy darajaga ko‘tarishga, ilm-fan natijalaridan olinadigan foydaning o‘sishiga va raqobatbardoshligining oshishiga xizmat qiladi. Amaliy tadqiqotlar va ishlanmalar dasturi O‘zbekiston olimlari va iqtidorli yosh tadqiqotchilarining jahon standartlariga javob beradigan ilmiy ishlar bilan shug‘ullanishlariga zamin yaratadi. Bu mablag‘lar ilmiy tadqiqotlar, amaliy iqtisodiy tahlillar va xorijda ta’lim olish uchun ajratiladi.
Loyihaning 3-komponentiga esa 15 million AQSh dollari ajratilgan bo‘lib, bu mablag‘lar texnologiyalarni joriy etish, ilmiy konsepsiyalar yaratish, prototiplash, ilmiy-tadqiqot va tajriba konstruktorlik ishlari va tijoratlashtirish maqsadlariga sarflanishi ko‘zda tutilgan. Mazkur grant mablag‘lari tadbirkorlar, innovatsion startapchilar, texnologik innovatsiyalarni amalga oshirish va yangi yoki mukammallashtirilgan mahsulot (xizmatlar) yaratish imkoniyatiga ega bo‘lgan korxonalarga taqdim etilishi kutilmoqda. Bunda korxonalarga o‘z mablag‘larini ham o‘z loyihalariga sarflash sharti ham qo‘yiladi.
Tomonlar loyihaning keyingi bosqichini oktabr oyida muhokama qilishga kelishib oldi. Jahon banki vakillari Innovatsion rivojlanish vazirligi qoshidagi loyihani boshqarish guruhi faoliyati uchun 100 million AQSh dollari berilishi mumkinligini qayd etgan.
Izoh (0)