“O‘ldirilish imkonini taqdim etuvchi yangi imkoniyatlar asriga xush kelibsiz”. Vladimir Zelenskiyning BMTdagi chiqishi

Ko‘pchiligingiz ukrainalik opera qo‘shiqchisi Vasiliy Slipakni tinglagansiz, lekin endi uni hech qachon eshita olmaysiz — mana sababi [o‘qni ko‘rsatadi]. U 10 dollar turadi va bu sayyoramizdagi inson hayotining narxidir. Bu kabi taqdirlar minglab, bunday o‘qlar millionlab — o‘ldirilish imkonini taqdim etuvchi imkoniyatlar asriga, yigirma birinchi yuz yillikka xush kelibsiz. Zamonaviy dunyoda urushning begonasi yo‘q va “buning menga daxli yo‘q” degan fikr fojiali yakunlanishi mumkin. Ukraina yadroviy quroldan voz kechgandi, chunki biz barchamiz birgalikda yangi — seni yadroviy kallaklaring uchun emas, balki qilayotgan ishlaring uchun hurmat qilishadigan dunyoni quryapmiz, deb o‘ylagandik. Oqibatda biz bu “yangi dunyo”da hududimizning bir qismidan ayrildik va har kuni fuqarolarimizni yo‘qotyapmiz. Nazoratning xalqaro mexanizmlari benuqson emas va yangilanishga muhtoj. BMT minbaridan jarangdor va’dalar har vaqt eshitilib turadi, biroq bu va’dalar amallar bilan mustahkamlanishi lozim, negaki inson hayoti 10 dollar bo‘lgan dunyoda so‘zning qadri umuman yo‘q. Insoniyat butun tarixi davomida rivojlanib keldi, biroq bir narsa o‘zgarishsiz qolmoqda — 2019-yilda xalqlar o‘rtasidagi kelishmovchiliklar hali ham raketalar orqali hal qilinmoqda. Not by word, but by war. Biz nafrat va tajovuzga o‘rin qoldirmaydigan yangi insoniy dunyoqarash uchun kurashmog‘imiz lozim.