Xitoyda jahondagi eng yirik — Dasin aeroporti ochildi. U Zaha Hadid loyihasi asosida qurilgan

Xitoyda dunyodagi eng katta deb e’tirof qilinayotgan Dasin aeroportining ochilish marosimi bo‘lib o‘tdi, deb xabar berdi Meduza.

Terminal Pekin markazidan janubda 46 kilometr uzoqlikda joylashgan va Xitoy Xalq Respublikasining 70 yilligiga bag‘ishlab Zaha Hadid arxitektura byurosi tomonidan loyihalashtirilgan.

Reuters agentligi ma’lumotlariga ko‘ra, qurilish ishlari besh yil davom etgan va unga 450 milliard yuan (63 milliard AQSh dollari) sarf qilingan.

Yangi aeroport to‘rtta uchish-qo‘nish liniyasiga ega. Taxminlarga ko‘ra, 2025-yilda Dasinning yo‘lovchi o‘tkazish quvvati yiliga 72 million yo‘lovchiga yetadi va keyinchalik bu ko‘rsatkich yiliga 100 million yo‘lovchiga o‘sishi mumkin.

Dasinning asosiy aviakompaniyalari China Southern Airlines hamda China Eastern Airlines bo‘ladi. Bundan tashqari yana 50 ta xorijiy aviakompaniya aeroportni o‘z yo‘nalishlariga kiritishni maqsad qilgan.