Shavkat Mirziyoyev DXXga tarixiy davr arxiv hujjatlarini maxfiylikdan chiqarish bo‘yicha topshiriq berdi

Shavkat Mirziyoyev 2020-yil 1-iyungacha Davlat xavfsizlik xizmati davlat arxivlarida saqlanayotgan tarixiy davr (1917-yilgacha) arxiv hujjatlarini o‘rnatilgan tartibda maxfiylikdan chiqarish bo‘yicha topshiriq berdi. Shuningdek, O‘zbekistonda arxiv ishi va ish yuritishni takomillashtirish chora-tadbirlari to‘g‘risida Prezident farmoni qabul qilindi. Bu haqda “Huquqiy axborot” kanali xabar berdi.

Farmonga ko‘ra, Vazirlar Mahkamasi huzuridagi “O‘zarxiv” agentligi negizida O‘zbekiston Respublikasi “O‘zarxiv” agentligi tashkil etildi.

2020-yil 1-iyungacha quyidagi davlat xizmatlari Davlat xizmatlari markazlari va YaIDXP orqali ko‘rsatilishi joriy etiladi:

• o‘qiganlikni tasdiqlash haqidagi arxiv ma’lumotnomasini berish;
• ish stajini tasdiqlash haqidagi arxiv ma’lumotnomasini berish;
• ish haqini tasdiqlash haqidagi arxiv ma’lumotnomasini berish;
• arab alifbosida yaratilgan turkiy, forsiy va arabcha hujjatlardagi axborotlar bo‘yicha annotatsiya ma’lumotlarini tayyorlab berish;
• arxiv hujjatlari, kitoblar va qo‘lyozmalarni raqamlashtirish (elektron nusxa olish).
• Mazkur arxiv ma’lumotnomalarini berish bo‘yicha davlat xizmatlari ko‘rsatilganligi uchun yig‘im undirilmaydi.