O‘zbekistonda parlament huzurida axborot sohasini rivojlantirish bo‘yicha Jamoatchilik kengashi tuziladi
Oliy Majlis huzurida Axborot sohasi va ommaviy kommunikatsiyalarni rivojlantirish masalalari bo‘yicha jamoatchilik kengashi tuziladi. Bu masala Oliy Majlis Senati va Qonunchilik palatasi Kengashlarining qo‘shma majlisida ko‘rib chiqildi, deya xabar bermoqda Senat axborot xizmati.
Majlisda so‘zga chiqqanlar O‘zbekiston media bozorini jadal rivojlantirish, davlat organlari va boshqa tashkilotlarning virtual makondagi faolligini ta’minlash, milliy axborot industriyasi va infratuzilmasini rivojlantirish, shuningdek, global axborot muhitiga oid zamonaviy tendensiyalarini hisobga olgan holda qonun hujjatlari va huquqni qo‘llash amaliyotini liberallashtirish hamda demokratlashtirishga yetarlicha e’tibor berilmayotganiga to‘xtalib o‘tgan.
Axborot sohasiga oid dolzarb masalalar yuzasidan jamoatchilik fikrini shakllantirishda jamoat tashkilotlari ahamiyatini oshirish, davlat organlari va ommaviy kommunikatsiyalar subyektlari o‘rtasida muloqotni yo‘lga qo‘yish, shuningdek, axborot sohasini yanada erkinlashtirish va demokratlashtirish maqsadida Oliy Majlis huzurida Axborot sohasi va ommaviy kommunikatsiyalarni rivojlantirish masalalari bo‘yicha jamoatchilik kengashi tuzish muhimligi ta’kidlangan.
“Ushbu yangi tuzilmaning asosiy vazifasi ochiq axborot makonini yaratishga qaratilgan sa’y-harakatlarni birlashtiradigan zamonaviy, demokratik va shaffof maydon sifatida davlat va ommaviy axborot vositalari, fuqarolik jamiyati institutlari vakillarining samarali muloqotini ta’minlashdan iborat bo‘lishi lozim. Aholining axborot madaniyatini oshirishga qaratilgan tadbirlar o‘tkazish ham Jamoatchilik kengashi faoliyati maqsadlaridan biri bo‘lishi kerak”, — deyiladi Senat axborotida.
Yangi tuzilma xalqaro reytinglarda O‘zbekiston egallagan o‘rinlarni izchil yaxshilash va mamlakatning ommaviy axborot vositalari erkinligi indekslari yuqori darajada bo‘lgan ilg‘or mamlakatlar qatoriga kirishini ta’minlash dasturlari bo‘yicha takliflar ham tayyorlaydi.
Jamoatchilik kengashiga yuklangan vazifalarni bajarish, uning faoliyatini samarali tashkil etish maqsadida nodavlat notijorat tashkiloti shaklida Axborot sohasi va ommaviy kommunikatsiyalarni rivojlantirish masalalari bo‘yicha markaz tashkil etilishi taklifi ma’qullandi hamda u Jamoatchilik kengashining ishchi organi sifatida belgilandi.
