Олий Мажлис ҳузурида Ахборот соҳаси ва оммавий коммуникацияларни ривожлантириш масалалари бўйича жамоатчилик кенгаши тузилади. Бу масала Олий Мажлис Сенати ва Қонунчилик палатаси Кенгашларининг қўшма мажлисида кўриб чиқилди, дея хабар бермоқда Сенат ахборот хизмати.
Мажлисда сўзга чиққанлар Ўзбекистон медиа бозорини жадал ривожлантириш, давлат органлари ва бошқа ташкилотларнинг виртуал макондаги фаоллигини таъминлаш, миллий ахборот индустрияси ва инфратузилмасини ривожлантириш, шунингдек, глобал ахборот муҳитига оид замонавий тенденцияларини ҳисобга олган ҳолда қонун ҳужжатлари ва ҳуқуқни қўллаш амалиётини либераллаштириш ҳамда демократлаштиришга етарлича эътибор берилмаётганига тўхталиб ўтган.
Ахборот соҳасига оид долзарб масалалар юзасидан жамоатчилик фикрини шакллантиришда жамоат ташкилотлари аҳамиятини ошириш, давлат органлари ва оммавий коммуникациялар субъектлари ўртасида мулоқотни йўлга қўйиш, шунингдек, ахборот соҳасини янада эркинлаштириш ва демократлаштириш мақсадида Олий Мажлис ҳузурида Ахборот соҳаси ва оммавий коммуникацияларни ривожлантириш масалалари бўйича жамоатчилик кенгаши тузиш муҳимлиги таъкидланган.
«Ушбу янги тузилманинг асосий вазифаси очиқ ахборот маконини яратишга қаратилган саъй-ҳаракатларни бирлаштирадиган замонавий, демократик ва шаффоф майдон сифатида давлат ва оммавий ахборот воситалари, фуқаролик жамияти институтлари вакилларининг самарали мулоқотини таъминлашдан иборат бўлиши лозим. Аҳолининг ахборот маданиятини оширишга қаратилган тадбирлар ўтказиш ҳам Жамоатчилик кенгаши фаолияти мақсадларидан бири бўлиши керак», — дейилади Сенат ахборотида.
Янги тузилма халқаро рейтингларда Ўзбекистон эгаллаган ўринларни изчил яхшилаш ва мамлакатнинг оммавий ахборот воситалари эркинлиги индекслари юқори даражада бўлган илғор мамлакатлар қаторига киришини таъминлаш дастурлари бўйича таклифлар ҳам тайёрлайди.
Жамоатчилик кенгашига юкланган вазифаларни бажариш, унинг фаолиятини самарали ташкил этиш мақсадида нодавлат нотижорат ташкилоти шаклида Ахборот соҳаси ва оммавий коммуникацияларни ривожлантириш масалалари бўйича марказ ташкил этилиши таклифи маъқулланди ҳамда у Жамоатчилик кенгашининг ишчи органи сифатида белгиланди.
Изоҳ (0)