Qashqadaryo viloyati hokimi Zafar Ro‘ziyev Koson tumanidagi 62-sonli maktabning “Birinchi qo‘ng‘iroq” tadbirida ishtirok etib, maktab o‘quvchilari bilan birga davlat madhiyasini kuyladi. Bu haqda “Daryo”ga viloyat hokimligi axborot xizmati ma’lum qildi.
— Shuningdek, viloyat hokimi o‘quvchilarga mustaqillik darsi ham o‘tdi, — deydi axborot xizmati rahbari Ahror Sodiqov. — Unda mustaqillikning milliy taraqqiyot, bugungi va kelgusi avlodlar taqdiri, kelajagi uchun ahamiyati, yillar o‘tishi bilan tobora ortib borayotgani, mamlakatning xalqaro miqyosdagi obro‘-e’tiborini yuksaltirishning mustahkam poydevori bo‘lib kelayotganini alohida ta’kidladi.
Qashqadaryo viloyatida viloyat hokimidan tashqari Dehqonobod tumani hokimi ham tumanning Beshbuloq shaharchasidagi 23-umumta’lim maktabining “Birinchi qo‘ng‘iroq” tadbirida ishtirok etgan.
Tuman hokimligi axborot xizmatidan bildirilishicha, tuman hokimi dars avvalida o‘quvchilarga maktab ta’limining inson hayotidagi ahamiyati haqida so‘z ochib, maktabda yaxshi ta’lim olish inson kelajagini belgilab berishini ta’kidlagan. 1-sinf o‘quvchilariga 12 turdagi o‘quv qurollaridan iborat Prezident sovg‘asini topshirgan.
Axborot xizmati xabariga ko‘ra, Zoir Aliqulov dars yakunida yangi tashabbusni ilgari surgan. Tuman hokimi birinchi chorak yakuniga ko‘ra, maktabning 5—9 sinf o‘quvchilari o‘rtasidagi reytingi yuqori, eng a’lochi va jamoatchi sinfni otaliqqa oladi. Hokim bir vaqtning o‘zida o‘sha sinfga hafta davomida 2 soat dars o‘tadi. O‘quvchilarga rahbarlik vazifasini bajaradi va o‘sha sinfning kami-ko‘sti haqida ham qayg‘uradi.
Izoh (0)