Қашқадарё вилояти ҳокими Зафар Рўзиев Косон туманидаги 62-сонли мактабнинг «Биринчи қўнғироқ» тадбирида иштирок этиб, мактаб ўқувчилари билан бирга давлат мадҳиясини куйлади. Бу ҳақда «Дарё»га вилоят ҳокимлиги ахборот хизмати маълум қилди.
— Шунингдек, вилоят ҳокими ўқувчиларга мустақиллик дарси ҳам ўтди, — дейди ахборот хизмати раҳбари Аҳрор Содиқов. — Унда мустақилликнинг миллий тараққиёт, бугунги ва келгуси авлодлар тақдири, келажаги учун аҳамияти, йиллар ўтиши билан тобора ортиб бораётгани, мамлакатнинг халқаро миқёсдаги обрў-эътиборини юксалтиришнинг мустаҳкам пойдевори бўлиб келаётганини алоҳида таъкидлади.
Қашқадарё вилоятида вилоят ҳокимидан ташқари Деҳқонобод тумани ҳокими ҳам туманнинг Бешбулоқ шаҳарчасидаги 23-умумтаълим мактабининг «Биринчи қўнғироқ» тадбирида иштирок этган.
Туман ҳокимлиги ахборот хизматидан билдирилишича, туман ҳокими дарс аввалида ўқувчиларга мактаб таълимининг инсон ҳаётидаги аҳамияти ҳақида сўз очиб, мактабда яхши таълим олиш инсон келажагини белгилаб беришини таъкидлаган. 1-синф ўқувчиларига 12 турдаги ўқув қуролларидан иборат Президент совғасини топширган.
Ахборот хизмати хабарига кўра, Зоир Алиқулов дарс якунида янги ташаббусни илгари сурган. Туман ҳокими биринчи чорак якунига кўра, мактабнинг 5—9 синф ўқувчилари ўртасидаги рейтинги юқори, энг аълочи ва жамоатчи синфни оталиққа олади. Ҳоким бир вақтнинг ўзида ўша синфга ҳафта давомида 2 соат дарс ўтади. Ўқувчиларга раҳбарлик вазифасини бажаради ва ўша синфнинг ками-кўсти ҳақида ҳам қайғуради.
Изоҳ (0)