O‘zbekistonda oktabr oyining birinchi haftasi “Keksalar haftaligi” etib belgilanadi

Normativ-huquqiy hujjatlar loyihalari muhokamasi portalida Vazirlar Mahkamasining “Keksa avlod vakillarining jamiyatdagi o‘rni va ijtimoiy faolligini yanada oshirish chora-tadbirlari to‘g‘risida”gi qarori loyihasi e’lon qilindi, deb yozadi O‘zA.

Qarorda keltirilishicha, keksa avlod vakillarini ijtimoiy himoya qilish, ularga e’tibor va g‘amxo‘rlikni kuchaytirish, turmush sharoitini yaxshilash, faol va mazmunli hayot kechirishlarini ta’minlash, ularning boy hayotiy tajribasidan keng foydalanish maqsadida Birlashgan Millatlar Tashkiloti Bosh Assambleyasining 1990-yil 14-dekabrdagi rezolyutsiyasi bilan e’lon qilingan 1-oktabr — “Xalqaro keksalar kuni”ni O‘zbekiston Respublikasida ham har yili ushbu sanada keng nishonlash maqsadida oktabr oyining birinchi haftasini “Keksalar haftaligi” etib belgilanadi.

Qarorga muvofiq:

• vazirliklar, idoralar va xo‘jalik boshqaruvi organlarida faoliyat yo‘nalishidan kelib chiqib rahbar o‘rinbosaridan biri jamoatchilik asosida keksalar masalalari bo‘yicha mas’ul etib belgilanadi va “faxriylar kengashlari” faoliyatini muvofiqlashtiradi;
• mehnat jamoalarida pensiyaga chiqish arafasida bo‘lgan mehnat faxriylarini uzoq yillik samarali faoliyati uchun taqdirlash va nafaqaga kuzatish tadbirlarini o‘tkazish joriy etiladi.

“Keksalar maslahati” guruhining asosiy vazifalari, funksiyalari, vakolatlari va faoliyatini tashkil etish tartibini belgilaydi.

Guruh jismoniy shaxslarning ixtiyoriyligiga asoslanib,o‘z faoliyatini jamoatchilik asosida olib boradigan, doimiy faoliyat yurituvchi maslahat-kengashi organi hisoblanadi.

Guruh Fuqarolarning o‘zini o‘zi boshqarish organlari faoliyatini muvofiqlashtirish bo‘yicha respublika, hududiy (viloyat, tuman va shahar) kengashlar (keyingi o‘rinlarda respublika, hududiy kengashlar) qoshida hamda barcha fuqarolar yig‘inlarida tashkil etiladi.

Respublika guruhi vazirlik va idoralar qoshida tashkil etilgan faxriylar kengashlari bilan yaqin hamkorlikda faoliyat olib boradi.

Guruh qarorlari tavsiyaviy xususiyatga ega. Uning nizomi va unga kiritiladigan o‘zgartirishlar hamda qo‘shimchalar tegishli respublika, hududiy kengashlar boshqaruvi hamda fuqarolar yig‘inlari qarori bilan tasdiqlanadi.

Guruh oshkoralik, kollegiallik, o‘zaro hurmat, teng huquqlilik, ixtiyoriylik va jamoat fikrini hisobga olish tamoyillari asosida faoliyat yuritadi.