Toshkent shahar IIBB YHXB xodimlari tomonidan har kuzda umumta’lim muassasalari yaqinida yo‘l harakati xavfsizligini oshirishga qaratilgan bir qator choralar ko‘riladi, deb xabar beradi poytaxt IIBB matbuot xizmati.
“Piyodalar yo‘lakchalarining chizmalari yangilanadi, tumanlar infratuzilmasi yangi yo‘l belgilari va svetoforlar bilan boyitiladi. Ammo an’anaviy yondashuv bilan cheklanib qolish mumkin emas — o‘sib kelayotgan avlod uchun o‘quv dargohlariga olib boradigan yo‘llarni xavfsiz qilish uchun yangi usullarni qo‘llash zarur”, — deyiladi xabarda.
Sinov tariqasida Yashnobod tumanidagi 166-son umumta’lim maktabining yonida haydovchilarni e’tiborli, ehtiyot va ogoh bo‘lishga, o‘qish kunlarida soat 7:30 dan 18:00 gacha tezlikni soatiga 30 kilometrgacha tushirishga chaqiruvchi “Maktab!” deb nomlanuvchi nostandart yo‘l belgisi o‘rnatildi.
“Ushbu yondashuv haydovchilarni mas’uliyatliroq bo‘lishlarida muhim o‘rin tutadi, degan umiddamiz”, deyiladi Toshkent shahar IIBB matbuot xizmati xabarida.
Izoh (0)