Toshkent shahrida Vazirlar Mahkamasi huzuridagi Din ishlari bo‘yicha qo‘mita tomonidan “Haj—2019” mavsumi yakunlariga bag‘ishlangan brifing tashkil etildi. Bu haqda Din ishlari bo‘yicha qo‘mita matbuot xizmati “Daryo”ga xabar berdi.
“Bu yil qariyb yetti ming nafar kishi Haj safarida bo‘lib, islom dinining beshinchi arkonini ado etib qaytdi. Ularga ishchi guruhining 200 dan ziyod a’zolari hamrohlik qilib, muqaddas ibodat ruknlarini to‘la-to‘kis bajarishlari uchun yaqindan ko‘mak berdi”, — deyiladi xabarda.
“Bu yilgi Haj mavsumi Prezidentimizning tavsiyalari, O‘zbekiston Respublikasi Vazirlar Mahkamasining qarorlari asosida yuqori saviyada tashkil etildi. Avvalo, ulug‘ ziyoratga boruvchilar adolat mezoni asosida saralandi. Bunda nomzodlarning islom dini arkonlarini bilishi, ma’naviyati, ma’rifati va odob-axloqi bilan birga, mahallada obro‘-e’tiborga ega bo‘lishi, jamoatchilik ishlarida faolligiga alohida e’tibor qaratildi. Ular bilan suhbatlar o‘tkazilib, jamoatchilik fikri o‘rganildi. Natijada respublika bo‘yicha 6970 nafar fuqaro Haj safariga borish uchun tavsiya qilindi.
Quvonarlisi, ziyoratga otlangan yurtdoshlarimiz tomonidan jami 14326 nafar ijtimoiy ko‘makka muhtoj, kam ta’minlangan hamda boquvchisini yo‘qotgan fuqaro otaliqqa olinib, muborak safar oldidan 9,3 milliard so‘mlik moddiy yordam ko‘rsatildi”, — deydi Din ishlari bo‘yicha qo‘mita raisining birinchi o‘rinbosari Muzaffar Komilov.
“Anjumanda davlat rahbarining tashabbusi bilan har bir ziyoratchidan olinadigan mablag‘ o‘tgan yildagiga nisbatan 5 million so‘mga arzonlashtirilgani, Madina va Makka shaharlarida ziyoratgohlarga yaqin, eng muhimi, yuqori darajada servis xizmatlari ko‘rsatiladigan mehmonxonalardan foydalanilgani, pirovardida O‘zbekiston hojilarga yaratilgan shart-sharoitlar bo‘yicha birinchi beshtalik davlatlar qatoridan joy olgani e’tirof etildi”, — deyiladi xabarda.
Brifingda joriy yil Umra mavsumi 20-sentabrdan boshlanishi, 1-oktabrdan e’tiboran esa kuniga 2 ta maxsus aviareys yo‘lga qo‘yilishi ma’lum qilindi.
Izoh (0)