O‘zbekiston Respublikasi Prezidenti Administratsiyasi huzuridagi Axborot va ommaviy kommunikatsiyalar agentligida Davlat test markazi mas’ul xodimlari ishtirokida matbuot anjumani bo‘lib o‘tdi, deb xabar berdi O‘zA.
Ro‘yxatga olingan 1 million 66 ming abituriyentdan 979 ming 468 nafari test sinovlari topshirishi belgilangan bo‘lib, ulardan 954 ming 74 nafari qatnashdi, 24 ming 930 abituriyent test sinovlarida ishtirok eta olmadi, 465 nafari esa test sinovlaridan chetlashtirildi.
Bu yilgi test sinovlarini o‘tkazish jarayonlarida yangi tizimlar joriy etildi. Jumladan, ro‘yxatga olish, abituriyent ruxsatnomalarini Davlat test markazining saytidan olish onlayn tizimda amalga oshirildi, uchtagacha ta’lim yo‘nalishini tanlash huquqi berildi, test sinovini istalgan hududda topshirish imkoni yaratildi, test sinovlari natijalari topshirilgan kunning ertasiga e’lon qilindi. Shuningdek, javoblar varaqasiga abituriyentning familiyasi, ismi va sharifi yozilgan holda taqdim etildi, nogironligi bo‘lgan shaxslar alohida kunlarda test sinovlariga jalb etildi.
Har bir ta’lim yo‘nalishi bo‘yicha test sinovi topshirganlarning ballarini ko‘rib turish imkoniyati yaratilgani shaffoflikning belgisidir. To‘ldirilgan javob varaqalarining skaner qilingan nusxalari, to‘g‘ri va noto‘g‘ri javoblar to‘g‘risida ma’lumotlar abituriyentlarning shaxsiy kabinetlariga joylashtirildi. Bu xolislikning belgisi bo‘ldi, — deyiladi xabarda.
O‘tkazilgan test sinovlarida yutuqlar bilan birga kamchiliklar ham kuzatildi. Abituriyentlar tomonidan hujjatlarni soxtalashtirish, o‘ringa o‘rin kirish holatlari, bir necha nazorat postlaridan o‘tsa-da, bino ichiga telefon, shpargalka va shu kabi noqonuniy buyumlarni olib kirishga urinish, test materiallarini olib chiqish holatlari kuzatildi.
Mandat natijalari e’lon qilinishi kechikdi. Mutaxassislar bunga asosiy sabablardan biri etib imtiyoz turlarining ko‘pligi, ba’zi imtiyozlarga aniqlik kiritilishi jarayoni, tasdiqlanishi ko‘p vaqtning olganligi, har bir abituriyentning tanlangan uchta ta’lim yo‘nalishi kesimida tekshirish bo‘lganini aytdi.
Izoh (0)