Armaniston, Tayvan, Ummon, Ruminiya hamda O‘zbekiston National Geographic Traveler Awards 2019 tanlovining “Yil kashfiyoti” nominatsiyasida g‘oliblik uchun kurash olib bormoqda, deb xabar beradi Turizmni rivojlantirish qo‘mitasi matbuot xizmati.
National Geographic jurnalining Rossiyadagi versiyasiga ko‘ra, joriy yilda eng yaxshilar 24 nominatsiya bo‘yicha saralanmoqda. Mazkur mukofotni qo‘lga kiritish xalqaro turizm olamida juda katta nufuzga ega. “Yil kashfiyoti” nominatsiyasida O‘zbekiston hozircha 22 foiz ovoz olib, 43 foiz ovozga ega Armanistondan keyin ikkinchi o‘rinda kelmoqda. Uchinchi o‘rinda 17 foiz ovoz bilan Ruminiya mamlakati qayd etilgan. To‘rtinchi va beshinchi pog‘onalarni 9 foiz ovoz bilan Tayvan hamda Ummon egallamoqda.
Ta’kidlash joizki, National Geographic Traveler Awards’ning o‘tgan yilgi tanlovida O‘zbekiston “Gastronomik turizm” yo‘nalishida g‘olib sifatida e’tirof etilgan edi. Bu yilgi ovoz berish jarayoni 12-oktabrga qadar davom etadi.
“O‘zbekiston turizmining jahon sahnida yuksalishiga o‘z hissangizni qo‘shing va uning “Yil kashfiyoti” nominatsiyasida g‘olib bo‘lishi uchun quyidagi havola orqali ovoz bering”, — deyiladi xabarda.
Izoh (0)