O‘zbekistonda yuridik xizmat faoliyatini tartibga soluvchi qonun hujjatlari talablarini buzayotgan mansabdor shaxslar uchrab turibdi. Joriy yilning o‘tgan davrida 50 dan ko‘proq shunday holatlar aniqlangan. O‘tgan yil shu davrda bu 39 tani tashkil etgan.
Barcha holatlar bo‘yicha tegishli tashkilotlarga takliflar kiritilishi natijasida 80 nafar mansabdor shaxsga nisbatan intizomiy javobgarlik choralari qo‘llanilgan. Bu haqda Adliya vazirligi tomonidan tashkil etilgan matbuot anjumanida ma’lum qilindi.
Yuridik xizmatlar faoliyati davlat rahbarining 2017-yil 19-yanvardagi “Yuridik xizmat faoliyatini tubdan takomillashtirish chora-tadbirlari to‘g‘risida”gi qarori bilan qo‘llab-quvvatlanmoqda va rivojlantirilmoqda.
Qaror qabul qilingunicha yuridik xizmatlar tomonidan davlat organlari va tashkilotlar foydasiga bor-yo‘g‘i 3 milliard 350 million so‘m undirilgan bo‘lsa, mazkur qaror qabul qilinganidan to hozirgi davrga qadar 56 milliard 647,6 million so‘m undirilgan. Bu yuridik xizmatlarning ancha faollashganini ko‘rsatib turibdi.
Bundan tashqari, yuridik xizmat xodimlariga martaba darajalari berilmoqda. Xususan, 2017-yilda 480 nafar, 2018-yilda 920 va 2019-yilning hozirgi davrigacha 335 nafar yuridik xizmatlar xodimlariga martaba darajalari berilgan.
Biroq, shunga qaramay, yuridik xizmatlar faoliyati zamon talabi darajasida, deb aytib bo‘lmaydi. Ular o‘zlari ishlayotgan tashkilot manfaatlari himoyasini har tomonlama ta’minlashi zarur. Lekin ijtimoiy tarmoqlarda biror tashkilotga nisbatan salbiy fikrlar paydo bo‘lsa, ularga nisbatan huquqiy jihatdan asoslangan munosabatlar berilmaydi. Yoki tashkilot yuristlari raddiya berish tashabbusini ko‘rsatmaydi. Bugungi tezkor zamon talabi esa yuristlardan ham shunga monand ishlashni taqozo qilmoqda.
Izoh (0)