Qoraqalpog‘istonda iqlim o‘zgarishiga moslashish choralariga bag‘ishlangan seminar-trening o‘tkazildi
Iqlim o‘zgarishiga moslashish choralarini joriy etishni rag‘batlantirish maqsadida me’yoriy-huquqiy bazani takomillashtirish bo‘yicha takliflarni keng muhokama qilish uchun 22-avgust kuni Birlashgan Millatlar Tashkiloti Taraqqiyot Dasturi (BMTTD) ko‘magida Toshkent agrar universitetining Nukus filialida seminar-trening o‘tkazildi.
BMTTD matbuot xizmati xabariga ko‘ra, unda fermer va dehqon xo‘jaliklari bilan ishlashni hamda suv va yer resurslarini samarali boshqarish amaliyotlarini, iqlimiy barqaror dehqonchilikni joriy qilishni kuchaytirish zarurati ta’kidlangan.
Treningda Qoraqalpog‘istonning vazirlik va idoralari, ya’ni Jo‘qarg‘i Kengesi, Vazirlar Kengashi Xotin-qizlar qo‘mitasi, Qishloq xo‘jaligi vazirligi, Suv xo‘jaligi vazirligi, Fermerlar Kengashi, Moliya vazirligi, Iqtisodiyot vazirligi, Innovatsiyalar bo‘yicha markaz, Toshkent agrar universitetining Nukus filiali, Savdo-sanoat palatasi va Davyergeodezkadastr vakillari ham ishtirok etdi.
2014-yildan buyon BMTning O‘zbekistondagi Taraqqiyot dasturi O‘zbekiston Gidrometeorologiya xizmati markazi bilan birgalikda Adaptatsion fondning moliyaviy ko‘magidagi “O‘zbekistonning qurg‘oqchil hududlarida joylashgan fermer va dehqon xo‘jaliklarining iqlim barqarorligini ta’minlash” qo‘shma loyihasini amalga oshirib kelmoqda.
Qishloq xo‘jaligi mahsulotlarini ishlab chiqarishdagi iqlimga barqaror amaliyotlarni joriy etish hamda landshaft darajasida iqlim o‘zgarishi oqibatlari natijasida qurg‘oqchilikning ko‘payishi xatarliklariga moslashuv bo‘yicha yondashuvni amalga oshirish asosiy maqsadlardan biri hisoblanadi. Loyiha mutaxassislari tomonidan hozirgi kunda innovatsion yechimlarsiz ish yuritib bo‘lmaydigan moslashish choralarini amalga oshirishga yo‘naltirilgan amaldagi me’yoriy-huquqiy baza tahlil qilindi.
“O‘zbekiston Respublikasi Prezidentining qarori bilan ilmiy tadqiqot va amaliy ishlarni rivojlantirish, ekotizim va barqaror turmush tarzini yaxshilash, qurib qolgan Orol dengizi tubidagi sho‘rxok yerlarda ilg‘or tadqiqotlar tajribalarini va innovatsiyalarni joriy etish maqsadida O‘zbekiston Respublikasi Prezidenti huzurida Orolbo‘yi Xalqaro innovatsiya markazi tashkil etildi. Bizning oldimizda moslashuv agronomik amaliyotlarni rag‘batlantiradigan qonunchilik va huquqiy bazani yaratish uchun mazkur tashabbusni qo‘llab-quvvatlashdek vazifa turibdi. Iqlim o‘zgarishi oqibatida qishloq xo‘jaligi uchun yuzaga kelgan xatarliklar barcha muayyan foydadan ustun ekanligini yodda tutish muhimdir”, — deydi loyiha konsultanti Hasan Mamarasulov.
Qayd etilishicha, seminar-trening 27-avgustga qadar 580 nafar ishtirokchini qamrab olgan holda Qoraqalpog‘istonning Kegeyli, Chimboy, Qanliko‘l, Taxtako‘pir va Mo‘ynoq tumanlarida o‘tkaziladi.
