O‘zbekistonda senatorlar qonunlar uchun ovoz berganda ism-shariflar bo‘yicha natijalarni ko‘rsatish taklif qilindi

22-avgust kuni Senat raisi Tanzila Norboyeva bir guruh jurnalist va blogerlarni Senat binosiga chaqirib, ular bilan uchrashuv tashkil qildi.

Xushnud Xudoyberdiyevga ko‘ra, uchrashuvdan anglashilgan asosiy jihatlar quyidagicha bo‘ldi:

bundan buyon Senat har yarim yillikda amalga oshirilgan ishlar to‘g‘risida xalq oldida ochiq hisobot berish tartibi yo‘lga qo‘yiladi;

kelgusida Senatning yalpi majlislarini jonli efirda translyatsiya qilish rejalashtirilmoqda (bugun ilk marotaba ana shunday jonli efir bo‘ldi). Bu senatorlarning faoliyatini xalqqa yanada yaxshiroq tanishtirishga katta yordam beradi;

yil oxirida bo‘lib o‘tadigan saylovlardan keyin yangi chaqiriqqa saylangan mahalliy kengashlarning faoliyatini keskin o‘zgartirish, ularning faolligini oshirish, shuningdek, ma’lum bir shtatda haq to‘lanadigan mahalliy deputatlar korpusini shakllantirish rejalashtirilmoqda;

Senat o‘zining yangi binosiga ko‘chgandan keyin jurnalist va blogerlarga ish faoliyatida kerak bo‘ladigan zamonaviy qurilmalar, xususan, mobil telefonni olib kirish bo‘yicha imkoniyatlar yaratish rejalashtirilmoqda;

uchrashuvda senatorlar qonunlarni yoqlab, qarshi bo‘lib yoki betaraf qolib ovoz berganda ekranda shunchaki raqamlar emas, balki ism-shariflar bo‘yicha natijalarni ko‘rsatish taklif qilindi. Shunda senatorlarning o‘ziga bo‘lgan mas’uliyati ortishi ta’kidlandi. Senat raisi ushbu taklifni ma’qulladi, ko‘rib chiqishini bildirdi;

senatning yangilangan talqindagi sayti yaratilmoqda. O‘sha saytda har bir senatorning shaxsiy sahifasini yaratib, unda senator tomonidan qilingan ishlarni (yuborgan senatorlik so‘rovlari hamda murojaatlari, qaysi qonunlarni ma’qullab, qaysilariga qarshi bo‘lgani va h.k.) aks ettirish taklif qilindi. Shunda fuqarolar o‘zining hududidan mas’ul bo‘lgan senatorning faoliyatiga baho bera olish imkoniga ega bo‘ladi.

Uchrashuv yakunida Tanzila Norboyeva jurnalist va blogerlar uchun Senat tomonidan yangi tanlov e’lon qilinganini ma’lum qildi. Senat faoliyatiga oid eng yaxshi materiallar saralanib, Konstitutsiya bayrami arafasida g‘oliblar taqdirlanadi.

Dastlab Tanzila Norboyeva tanlov nomini “Senat — xalq manfaatlari himoyachisi” deb nomlashni taklif qildi. Ammo bloger Eldar Asanov tanlovning bu nomi jurnalist va blogerlar Senatni faqat maqtashi kerak, degan xulosani beradi, Senat faoliyati haqida tanqidiy materiallar ham yozilishi mumkinligini bildirib, nomni o‘zgartirishni taklif qildi. Senat raisi bu tashabbusni ma’qulladi, muhokamalardan so‘ng tanlov nomi “Senat xalq manfaatlarini qanday himoya qilmoqda?” deya ta’kid emas, so‘roq formasiga o‘zgartirildi.