Иқлим ўзгаришига мослашиш чораларини жорий этишни рағбатлантириш мақсадида меъёрий-ҳуқуқий базани такомиллаштириш бўйича таклифларни кенг муҳокама қилиш учун 22 август куни Бирлашган Миллатлар Ташкилоти Тараққиёт Дастури (БМТТД) кўмагида Тошкент аграр университетининг Нукус филиалида семинар-тренинг ўтказилди.
БМТТД матбуот хизмати хабарига кўра, унда фермер ва деҳқон хўжаликлари билан ишлашни ҳамда сув ва ер ресурсларини самарали бошқариш амалиётларини, иқлимий барқарор деҳқончиликни жорий қилишни кучайтириш зарурати таъкидланган.
Тренингда Қорақалпоғистоннинг вазирлик ва идоралари, яъни Жўқарғи Кенгеси, Вазирлар Кенгаши Хотин-қизлар қўмитаси, Қишлоқ хўжалиги вазирлиги, Сув хўжалиги вазирлиги, Фермерлар Кенгаши, Молия вазирлиги, Иқтисодиёт вазирлиги, Инновациялар бўйича марказ, Тошкент аграр университетининг Нукус филиали, Савдо-саноат палатаси ва Давергеодезкадастр вакиллари ҳам иштирок этди.
2014 йилдан буён БМТнинг Ўзбекистондаги Тараққиёт дастури Ўзбекистон Гидрометеорология хизмати маркази билан биргаликда Адаптацион фонднинг молиявий кўмагидаги «Ўзбекистоннинг қурғоқчил ҳудудларида жойлашган фермер ва деҳқон хўжаликларининг иқлим барқарорлигини таъминлаш» қўшма лойиҳасини амалга ошириб келмоқда.
Қишлоқ хўжалиги маҳсулотларини ишлаб чиқаришдаги иқлимга барқарор амалиётларни жорий этиш ҳамда ландшафт даражасида иқлим ўзгариши оқибатлари натижасида қурғоқчиликнинг кўпайиши хатарликларига мослашув бўйича ёндашувни амалга ошириш асосий мақсадлардан бири ҳисобланади. Лойиҳа мутахассислари томонидан ҳозирги кунда инновацион ечимларсиз иш юритиб бўлмайдиган мослашиш чораларини амалга оширишга йўналтирилган амалдаги меъёрий-ҳуқуқий база таҳлил қилинди.
«Ўзбекистон Республикаси Президентининг қарори билан илмий тадқиқот ва амалий ишларни ривожлантириш, экотизим ва барқарор турмуш тарзини яхшилаш, қуриб қолган Орол денгизи тубидаги шўрхок ерларда илғор тадқиқотлар тажрибаларини ва инновацияларни жорий этиш мақсадида Ўзбекистон Республикаси Президенти ҳузурида Оролбўйи Халқаро инновация маркази ташкил этилди. Бизнинг олдимизда мослашув агрономик амалиётларни рағбатлантирадиган қонунчилик ва ҳуқуқий базани яратиш учун мазкур ташаббусни қўллаб-қувватлашдек вазифа турибди. Иқлим ўзгариши оқибатида қишлоқ хўжалиги учун юзага келган хатарликлар барча муайян фойдадан устун эканлигини ёдда тутиш муҳимдир», — дейди лойиҳа консултанти Ҳасан Мамарасулов.
Қайд этилишича, семинар-тренинг 27 августга қадар 580 нафар иштирокчини қамраб олган ҳолда Қорақалпоғистоннинг Кегейли, Чимбой, Қанликўл, Тахтакўпир ва Мўйноқ туманларида ўтказилади.
Изоҳ (0)