Namangan viloyatining Kosonsoy tumanida “Sohil” bolalar oromgohi qayta qurilib, foydalanishga topshirildi. Bu haqda “Daryo”ga Yoshlar ittifoqi viloyat kengashi axborot xizmati ma’lum qildi.
Mazkur bolalar sog‘lomlashtirish oromgohi tuman markazidan 3 kilometr uzoqda — tog‘ yonbag‘irlaridagi so‘lim va bahavo maskanda joylashgan bo‘lib, umumiy yer maydoni 1,8 gektarni tashkil etadi.
Avvallari oromgohdagi o‘rinlar soni 150 tani tashkil etgan bo‘lsa, qayta qurilgan maskan 200 nafarga yaqin bolani o‘z bag‘riga oldi. Buning uchun 2,8 milliard so‘m sarflandi.
Oromgohda barpo etilgan yotoq pavilyonlari zamonaviy mebellar bilan jihozlangan. Har bir yotoqxonada alohida hojatxona va dushxona mavjud bo‘lib, bolalar uchun barcha zarur shart-sharoitlar yaratilgan.
Jumladan, “Ma’naviyat va ma’rifat” maskani, tibbiyot majmui, oshxona, yozgi amfiteatr, suzish havzasi va sport majmuasi yosh avlod uchun xizmat qilmoqda.
Izoh (0)