Наманган вилоятининг Косонсой туманида «Соҳил» болалар оромгоҳи қайта қурилиб, фойдаланишга топширилди. Бу ҳақда «Дарё»га Ёшлар иттифоқи вилоят кенгаши ахборот хизмати маълум қилди.
Мазкур болалар соғломлаштириш оромгоҳи туман марказидан 3 километр узоқда — тоғ ёнбағирларидаги сўлим ва баҳаво масканда жойлашган бўлиб, умумий ер майдони 1,8 гектарни ташкил этади.
Авваллари оромгоҳдаги ўринлар сони 150 тани ташкил этган бўлса, қайта қурилган маскан 200 нафарга яқин болани ўз бағрига олди. Бунинг учун 2,8 миллиард сўм сарфланди.
Оромгоҳда барпо этилган ётоқ павильонлари замонавий мебеллар билан жиҳозланган. Ҳар бир ётоқхонада алоҳида ҳожатхона ва душхона мавжуд бўлиб, болалар учун барча зарур шарт-шароитлар яратилган.
Жумладан, «Маънавият ва маърифат» маскани, тиббиёт мажмуи, ошхона, ёзги амфитеатр, сузиш ҳавзаси ва спорт мажмуаси ёш авлод учун хизмат қилмоқда.
Изоҳ (0)