Toshkentdagi Milliy matbuot markazida 16-avgust kuni O‘zbekistonda “Halol” standartlarining joriy qilinishi hamda sertifikatlashtirish bo‘yicha amalga oshirilgan ishlar yuzasidan matbuot anjumani bo‘lib o‘tdi.
Tadbirda jurnalistlar tomonidan O‘zbekiston Mo‘g‘ulistondan import qiladigan go‘sht mahsuloti “Halol” standarti talablariga qanchalik muvofiq kelishi haqida ham savol berilgan, deya xabar bermoqda “Kun.uz”.
“Mo‘g‘ulistondan kirib keluvchi go‘sht mahsulotida ‘Halol’ sertifikati yo‘q va bunday talab ham qo‘yilmagan. Chunki barcha xaridorlar ham bu jihatga e’tibor bermaydi. Lekin bu iste’molga yaroqsiz degani emas. Agar mahsulot sanitariya-gigiyenik talablarga mos kelsa, u sotuvga chiqarilaveradi. Iste’molchining o‘zi tanlab olaveradi”, — deb javob bergan “O‘zstandart” agentligi bosh direktori o‘rinbosari Jasur Shukurov.
Avvalroq O‘zbekiston Mo‘g‘ulistondan go‘sht import qilmoqchi ekani, Mo‘g‘ulistondan go‘sht import qilish huquqi faqat uchta kompaniyaga berilishi kutilayotgani haqida xabarlar berilgan edi.
Izoh (0)